ژنانی هونەری دەست

IMG_0321

ڕێکخراوی کاری هونەری دەستی هەڵسا بە دروستکردنی بازاڕێک لەشێوەی فێستیڤاڵدا بۆ نمایشکردنی کارە دەستییەکانی ئەندامانی ڕێکخراوەکەیان. دوێنی ١٤/٢ لە ڕۆژی ڤالانتایندا دەستپێکی کردنەوەی فێستیڤاڵەکە بوو و دوو ڕۆژ دەخایەنێت.

شیلان جەلال یەکێک لەو ژنانەی بە کارە دەستییەکانی بەشداری بازاڕەکەی کردبوو بۆ چاوی خەڵک دوا “کارەکانمان هەمەجۆرە و هەرکەسە و لە بوارێکدا کاردەکات کارەکانمان بە گشتی لە  دارتاشیی و ٣دی و ئێکسسوارات و بابەتەکانی ناوماڵ و جوانکاریی پێک هاتوون.

هەروەها وتی “وابڕیارە هەفتەی جارێک لەم چالاکییانەمان بۆ بکەنەوە و هۆکاری ئەوەی کە هەفتەی جارێکە ئەوەیە کە کارەکانی ئێمە کاری دەستین و ئێمە بۆ هەر نمایشکردنێک پێویستمان بە خۆئامادەکردن و بەرهەمهێنانی کاری نوێیە”

شیلان دەربارەی پێشوازی کڕیاران لە پڕۆژەکەیان وتی “خەڵک پێشوازییەکی باش لە کارەکانمان دەکەن هەرچەندە لەم دۆخی قەیران و بێموچەییەداین، هێشتا خەڵک بە تامەزرۆییەوە دێت بۆ بینین و کڕینی کارە دەستییەکان”

شنیار خەسرەو یەکێکی دیکە لەو خانمانەی بە کارە دەستییەکانی بەشداری فێستیڤاڵەکەی کردبوو بۆ چاوی خەڵک دوا “دوێنێ بەهۆی ڤالانتاینەوە دەستمان بەم پڕۆژەیە کرد و ئەمڕۆ کۆتا ڕۆژە. ڕێکخراوەکەمان بەڵێنی پێداوین هەفتانە لەم چالاکییانەمان بۆ ڕێکبخات”

هەروەها وتی “گروپی کاری دەستییەکەمان نزیکەی ١٠٠ کەسین و ئەوانەیش کە ئەمڕۆ لێرە ئامادەن نزیکەی ٨٠ کەسن. کارەکانی من پێکهاتوون لە چنینی کڵاو و ملپێچ و جانتا و ئێکسسوارات بە مێخەک و شمڵی. سابوونی سروشتی بە بێ مادەی کیمیایی. بە گشتی سەرجەم کارەکانم کوردەوارین.

شنیار دەربارەی هاوکارییەکانی ڕێکخراوەکەیان وتی “ئەوان بەرپرسن لە دۆزینەوەی و شوێن و هەموو ئامادەکارییەکان لە شەوانیشدا پارێزگاریی لە کەل و پەلەکانمان دەکەن و تەنانەت دانانی مێز و کورسی و سەرچەفی سەر مێزەکانیش ئەوان بۆیان دابین کردوین.

ڕێکخراوی هونەری دەست، ڕێکخراوێکە تازە دامەزراوە و ئەمە یەکەمین چالاکییەتی. ڕێکخراوەکە هاوکاریی ئەو کەسانە دەکات کە کاری دەستی دەکەن بە کردنەوەی پیشانگە و بازاڕ و دۆزینەوەی کڕیار بۆیان.

شارا عارف دەستکارێکی دیکەی چالاکییەکەبوو بۆ چاوی خەڵک وتی “من لە ساڵی ٢٠١٦ وە خەریکی ئەم کارەم، سەرەتا بە کاری زۆر سادە دەستم پێکرد و کارەکانم تەنها بۆ خۆم و دواتر هاوڕێ و خزمەکانم بوو دواتریش بیرم لەوە کردەوە ئەم کارە بکەمە پیشە”

هەروەها وتی “ئێستاش بەردەوامم لە کارەکانم و لە ڕێگەی سۆشیال میدیاوە کڕیار بۆ کارەکانم دەدۆزمەوە و لە ئینستگرام پەیجێکم هەیە بە ناوی  “Shanya_Design”. کارەکانی من زیاتر کاری سەر جلی کوردی و جلی دەرەوەیە و چەفتە و کۆڵوانە و کڵاو. من زیاتر حەز بە کاری فۆلکلۆری دەکەم.

دەربارەی پێشوازی کڕیاران وتی “ئەم دۆخە وایکردووە خەڵک کەمتر شت دەکڕێت، ئەگەر نا بە گشتی خەڵک حەز بە کاری دەستی دەکات و حەزدەکەن کارە دەستییەکان بەکار بهێنن.

فرۆشیارەکان لە ژن و پیاو پێکهاتوون و نزیکەی ٨٠ ئەندامن، ڕێژەی فرۆشیارە ژنەکان زیاترە. سەرپەرشتیاری ڕێکخراوەکە پێی ڕاگەیاندین کە لەم چالاکییانە بەردەوام دەبن و تەنانەت دەچنە شار و شارۆچکەکانی هەرێمی کوردستان وەک هەولێر و هەڵەبجە و تەوێڵە.

چاوی خەڵک / تایبەت

Leave a comment