دهۆک؛ پێنج ژن پۆستی باڵایان وەرگرت و شەشەمیش لە چاوەڕوانیدایە

photo_2021-09-14_13-58-08

لەماوەی هەشت مانگی رابوردوو، پێنج ژن پۆستی باڵایان لە پارێزگای دهۆك وەرگرتووە، ئەمەش دەبێتە یەكەمجاركە لە ماوەیەكی كەمدا ئەوەندە پۆستی باڵا بدرێتە ژنان .

پارێزگای دهۆک یەکێکە لە چوار پارێزگاکەی هەرێمی کوردستان، دەکەوێرە باکوری رۆژئاوای پایتەختی هەرێمی کوردستانەوە، هاوسنورە لەگەڵ تورکیا، لە ناوچەکەدا کلتوری کۆنپارێزی و پیاوسالاری زیاتر لە ناوچەکانی تر هەستی پێدەکرێت، بەڵا هێدی هێدی ئەو کلتورە کاڵدەبێتەوە.

شەمعون شلیمون، جێگری پارێزگاری دهۆك بۆ كاروباری كارگێری بە (چاوی خەڵك)ی وت “تەنها لە كابینەی نۆیەمی حكومەتی هەرێم لە سنوری پارێزگای دهۆك پێنج ژن پۆستی باڵایان وەرگرتووە، رێژەی ژن لە پۆستە باڵاكاندا لە پارێزگای دهۆك نزیكەی لە ٪١٠یە كە ئەمەش بەگوێرەی ستاندارەدە جیهانییەکان رێژەیەكی زۆر كەمە”.

شەمعون شلیمون ئەوەشی نەیشاردەوە كە لە بەرنامەی حكومەتی هەرێمدایە ژنێكی تر بكرێتە قایمقامی یەكێك لە قەزایەكانی پارێزگای دهۆك وتی “پێشنیاز كراوە كە ژنێك بكرێتە قایمقام، بەڵام هێشتا بڕیاری كۆتایی دەرنەچووە، پێویستە بە یەكجاری واز لە كەلتوری پیاوسالاری بهێنرێت و ئەمە دەبێت ببێتە كردار و لە هەموو پارێزگایەك جێبەجێ‌ بكرێت”.

دادوەر هەدار عەبدولمەجید، لە كۆتایی مانگی تەموزی ٢٠٢١ بووە سەرۆكی داواكاری گشتی لە پارێزگای دهۆك، ئەمە یەكەمین جارە ژنێك ئەو پۆستە لەو پارێزگایە وەربگرت .

رۆژی ١٤/١/٢٠٢١ بە كۆی دەنگی ٢٣ ئەندامی ئەنجومەنی پارێزگای دهۆك، شیلان سامر وەكو بەرێوەبەری گشتی كاروباری مین لە پارێزگاكە هەڵبژێردرا، كە پێشتر پۆستەکە لەلایەن پیاوێکی سەربە یەكگرتووی ئیسلامی بەرێوەدەبرا .

دلڤین نێرەوەیی، ئەندامی ئەنجومەنی پارێزگای دهۆك بە ( چاوی خەڵك )ی وت “بڕیاری پێدانی پۆست بە ژنان دەگەرێتەوە بۆ حزب، لەناوچەكانی تر وەكو سلێمانی و هەڵەبجە لە مێژە بوار بە ژنان دراوە و دەیان ژن پۆستی باڵایان وەرگرتووە، بەڵام بۆ دهۆك شتێكی نویێیە”.

“تائێستا هیچ گلەیی و كێشەیەكی ئەو دامودەزگایانەی ئەو پێنج ژن بەڕێوەیان دەبەن بۆ ئەنجومەن نەهاتووە، بەپێی بەدواداچوونەكانمان كاروباری خەڵك زۆر بە رێكوپێكی و بێ‌كێشە بەرێوەدەبن” دلڤین سەلیم وادەڵێت.

لە سەرەتای مانگی شوباتی ئەمساڵ، میران عەبدولرەحمان تەها، وەك بەرێوەبەری ناحیەی بامەڕنی دەست بەكاربوو، بەمەش بوە یەكەم ژن  لە پارێزگای دهۆك پۆستی بەرێوەبەری ناحیەی وەربگریت .

 

میران عەبدولرەحمان تەها، بەرێوەبەری ناحیەی بامەڕنی بە (چاوی خەڵك )ی وت ” لە سەرەتای شوباتی ئەمساڵ وەكو بەرێوەبەری ناحیەی بامەرنێ‌ سەربە قەزای ئامێدی دەست بەكاربووم، زیاتر لە شەش مانگە  رۆژانە كاروباری خەڵك بەشێوەیەكی زۆر رێكوپێكی بەرێوەدەبم، خەڵكی ناوچەكەش زۆر پێیان خۆشە كە من بوومە بەرێوەبەری ناحیە و زۆریش هاوکارم دەبن”.

“گلەیی و كێشەكانی خەڵكی ناحیەكە ئاراستەی كارگێری پارێزگای دهۆك دەكەم، بەخۆشحاڵیەوە دوای دەست بەكاربوونم زۆرێك لە كێشەكانی خەڵكمان چارەسەركردوە، هەروەها كۆمەڵێك پرۆژەی خزمەتگۆزاری جێبەجێدەكرێن” میران عەبدولرەحمان وادەڵێت.

لە بواری ئەكادیمیشدا، بۆیەكەمجار ژنێك بەناوی ئاری عادل، دەبێتە سەرۆكی زانكۆی پۆلیتەكنیكی دهۆك و هەڵات عەبدولکەریمیش دەبێتە بەڕێوەبەری گشتیی چاکسازیی ژنان و نەوجەوانان.

شیلان سامر، بەرێوەبەری گشتی كاروباری مین بە چاوی خەڵکی راگەیاند “پێدانی پۆستی باڵا بە ژنان مافێكی شەرعی و یاسایی ژنانە، چونكە هیچ كەمتر نین لە پیاوان، لەسەر كەمی پێدانی پۆست بە ژن چەندین جار گلەیی خۆمان گەیاندوەتە لایەنە پەیوەندیدارەكان”.

ئەمە لەکاتێکدایە کە بەهۆی بەربەستە کۆمەڵایەتییەکانەوە ژنان لە هەرێمی کوردستان کەمتر دەتوانن بگەنە پلە و پێگەی هەستیار و کاریگەر، بەڵام لەم چەند ساڵەی دواییدا بەشێوەیەکی گشتی بەربەستەکانی بەردەم ژنان کەمتربوونەوتەوە و چەندین ژن توانیانە بە لێهوتووی و تواناکانیان خۆیان بگەیەننە جونگە هەستیارەکانی بواری سیاسەت و کارگێڕی.

 

چاوی خەڵک/ تایبەت

Leave a comment