ڕێکخراوی ژنانی کورد و خۆرهەڵاتی ناوەڕاست لە بەریتانیا پشتیوانی خۆی ڕادەگەیەنێت لە کەمپینی ” ناوی من ، ناوی دایکمە ” !

Untitled design (4)
ڕێکخراوی ژنانی کورد و خۆرهەڵاتی ناوەڕاست لە بەریتانیا پشتیوانی خۆی ڕادەگەیەنێت لە کەمپینی ” ناوی من ، ناوی دایکمە ” !
بەڕیزان ڕێکخەرانی کەمپینی ” ناوی من ، ناوی دایکمە “
لە ڕێگەی ئەم نامەیەوە پشتیوانی ڕێکخراوەکەمانتان پێ ڕادەگەیەنین لە کەمپینی ” ناوی من ، ناوی دایکمە” کە بە ئامانجی دابین کردنی مافی یاسایی و کۆمەڵایەتی ژنان و منداڵانێک دەستتان داوەتێ کە بوونەتە قوربانی کەلێنێکی یاسایی کە بێ بەشیان دەکات لە مافی ناسنامەی فەرمی و گونجاو لە عێراق و هەرێمی کوردستان. ئێمە ئەمە بە مافێکی سەرەتایی مرۆڤ دەزانین کە هەموو ئینسانێک ، هەموو ژن و منداڵێک ، پێویستە بەهرەمەند بن لە مافی هەڵگرتنی ناسنامەی گونجاو تا مافە مەدەنی و یاساییەکانیان بە یەکسانی لەگەڵ هەموو هاوڵاتیانی تر لە کۆمەڵگەی کوردستان و عێراقدا دابین بکرێت و پارێزراو بێت.
هەر لێرەوە هاوپشتی وهاودەنگی خۆمان دەخەینە پاڵ دەنگی ئێوە بۆ ڕەتکردنەوەی هەموو ئەو چەواشەکاری و بەلاڕیدابردنانە ، کە بە بەهانەی جۆراو جۆر ، لە هەوڵی ئەوەدان ئامانجی کەمپینەکەتان و هەقاننیەتی داواکاریەکەتان بخەنە ژێر پرسیارەوە . ڕێکخراوی ئێمە ، بە پێچەوانەی ئەو هەوڵانە ، هەنگاوەکەی ئێوە بەرز دەنرخێنێت لە ڕاستای خەبات کردن بۆ بونیاد نانی کۆمەڵگەیەکی مەدەنی وسیکولار کە بتوانێت مافی هەموو هاوڵاتیان یەکسان و هاوتا دابین بکات.
وەک پشتیوانیەک بۆ دەنگی ئێوە بە پێویستی دەزانین کە وەک نمونەیەک ئەوە ڕۆشن کەینەوە کە لە ووڵاتی بەریتانیا منداڵ لەڕۆژی لەدایک بوونیدا ناو و ناسنامەی فەرمی خۆی وەردەگرێت . کەسی سەرەکی لە دیاری کردن و بڕیاردان لەو ناو و ناسنامەیەدا دایکی منداڵەکەیە ، هەڵبەت بەڕێککەوتن لەگەڵ باوکی منداڵ لە کاتی بوون و ئامادەبوونیدا . بەڵام هیچ کات نەبوونی باوک یان ئامادەنەبوونی بۆ بەخشینی ناسنامەی خۆی بە منداڵ ، نابێتە هۆکارێک بۆ پێشێلکردنی مافەکانی ئەو منداڵە ، و یان ڕێگر لەبەردەم دانپێدانانی منداڵەکە وەک هاووڵاتیەکی تەواو و یەکسان لە لایەن دام و دەزگای ئیداری و حکومیەوە، ئەمەش بە یاسا چەسپێنراوە.
لەمەش زیاتر ، ئازادی هەڵبژاردنی ناو و ناسنامە ، و گۆڕینیان مافێکی سەرەتایی تاکە لەهەر قۆناغێکی ژیانیدا . بۆ منداڵانیش لە دوای ڕۆژی لە دایک بونیانەوە ، بە هەبوونی هۆکاری گونجاو و بە ڕەزامەندی دایک و باوک یان هەر بەخێوکەرێکی سەرەکیان ، وە لە چوار چێوەیەکی ڕێکخراو و پرۆسە یەکی فەرمی و یاساییدا ئەم مافە دیاری کراوە. خۆ ئەگەر ئەو منداڵە بەرهەمی دەستدرێژی جنسی یان دوورکەوتنەوە و نابەرپرسیارێتی باوکی بێت ، ئەوا ئەم مافەی منداڵ و دایک وەک خۆی پارێزراوە . بگرە هۆکاری لەوجۆرە بەرپرسیارێتی دەخاتە ئەستۆی دام و دەزگای دەوڵەت کە ئەو دایک ومنداڵە لە خزمەتگوزاری و پشتیوانی دەزگاکانی سەرپەرشتی کۆمەڵایەتی بەهرەمەند بن تا لە باری دەروونی و مادییەوە یارمەتی پێویست وەرگرن و ڕێگای ژیانکردنێکی شایستەیان بۆ فەراهەم بکرێت. ئەم هەوڵەی ئێوە سەرەتایەکی مێژوویی گرنگە بۆ بە ڕەسمی ناسینی ئەم مافە سەرەتایی یە لە عێراق و هەرێمی کوردستان ، بە تایبەت بۆ ئەو دایک ومنداڵانەی کە چەندین ساڵە بوونەتە قوربانی ئەم بێ مافی یە .
ئێمە لێرەوە دەستی هاوپشتیتان بۆ ڕادەکێشین و ئامادەین بۆ هەموو هاوکاری و چالاکیەکی پیویست لەگەڵتان تا ئامانجی ئەم کەمپینەتان بەدی دێت . لە کۆتاییدا ئێمەش وەک ئیوە خۆمان بە بەرپرس دەزانین لە هەوڵدانی بێ ووچان لە گەڵتان تا دابین کردنی مافی هاوڵاتیبوونی یەکسان و مافە سەرەتاییەکانی دایکان و منداڵانی قوربانی دەستی ئەم کێشە یاسایی وکۆمەڵایەتی یە.
سەرکەوتن بۆ کەمپینی ” ناوی من ، ناوی دایکمە “
ڕێکخراوی ژنانی کورد و خۆرهەڵاتی ناوەڕاست – بەریتانیا
٠٣/٠٩/٢٠٢١
بۆ پەیوەندی :
سەوسەن سەلیم : ٠٠٤٤٧٧٤٨٨٥١١٢٥ گۆنا سەعید : ٠٠٤٤٧٨٩٤٢٥٢٧٠٨

Leave a comment