شاتو؛ هیچ بەربەستێک نەهاتۆتە ڕێم و ئەگەر هەیشبێت تێکی دەشکێنم

photo_2021-01-18_15-37-50

خۆشناو موزیسییەن و ئەندامی گروپی موزیکی لوڕ دەربارەی ژیانی هونەریی خۆیی و قۆناغەکانی ژیانی بۆ چاوی خەڵک دوا.

شاتو دەربارەی سەرەتای دەستکردنی بە کاری هونەری وتی “سەرەتای کاری هونەرییم دەگەڕێتەوە بۆ ساڵی ٢٠٠٥ لە منداڵپارێزی کوردستان. ماوەی دوو ساڵ لە هەموو چالاکییەکانی منداڵپارێزدا بەشداریم دەکرد. دواتریش چومە ئۆرکێسترای منداڵانی سلێمانی و ماوەی دوو ساڵیش لەوێ بووم و لە فێستیڤاڵێکی نێودەوڵەتی چوارپارچەی کوردستاندا بەشداریم کرد و پلەی یەکەمم بەدەست هێنا.

باسی لە قۆناغی دواتر و خوێندنی موزیک بە شێوەی ئەکادیمی کرد و وتی “دواتر چوومە بەشی موزیکی پەیمانگەی هونەرە جوانەکان و بە درێژای ماوەی خوێندنم بەشداری سەرجەم کار و چالاکییەکانی ناو پەیمانگەم کردووە و ئێستاش دیبلۆمم لە بواری موزیکدا هەیە و لە ساڵی ٢٠١٢ وە ئەندامی گروپی موزیکی لوڕم.

(گروپی موزیکی لوڕ گروپێکی موزیکییە و لە کۆمەڵێک کچ و کوڕ پێک دێن و کار لە گۆرانیی و موزیکی کوردیدا دەکەن و لە هەوڵی پاراستن و هێشتنەوەی کولتوریی کوردیدان وەک هونەرێکی ڕەسەن)

 

 

جوانترین شتی ژیانی من هونەر و سەنتورەکەمە چونکە هەر کارێم نەتوانم بە زمان دەریببڕم لە ڕێی موزیک و هونەرەوە گوزارشتی لێدەکەم.

دەربارەی ئەو بەربەستانە یاخود ئەو شتانەی کە لە دەوروبەرەوە وەک کچێکی هونەرمەند ڕوبەڕوی دەبێتەوە وتی “چواردەورەکەم و خێزانەکەم هاوکارم بوون لە بەرەوپێشچوونم و هانیانداوم و تا ئێستا هیچ بەربەستێک نەهاتۆتە ڕێم و ئەگەر هەیشبێت تێکی دەشکێنم.

شاتو باسی لە شێوازەکانی ژەندن و کاری بە گروپ کرد و وتی “جیاوازی نێوان ژەندنی بە کۆمەڵ و تاکژەنیی ئەوەیە، کاتێک بە تەنها دەژەنیت گوزارشت لە خودی خۆت دەکەیت و سەربەستییەکی تەواوت لە کاتی ژەندن و تەنانەت شێوازی ژەندنیشدا دەبێت، بەڵام کاتێک لەگەڵ گروپێکدا دەژەنیت زۆر شت دەگۆڕێت، بۆ نمونە پابەندبوون بە تەواوی گروپەکە و ڕێسا و یاساکانییەوە، من زیاتر چێژ لە کارکردن لەناو گروپدا وەردەگرم.

 

 

هەروەها لەبارەی موزیک و گۆرانی ئەمڕۆی کوردییەوە وتی “بەداخەوە موزیک و گۆرانی کوردی پێشکەوتنی بەخۆوە نەبینیوە و گوێگرانیش ڕۆڵیان هەیە لە ئاراستەکردنی گۆرانیبێژەکاندا، بۆ نمونە گەنجێک گۆرانییەکی میلەتێکی دیکە دەهێنێت و کەڤەری دەکات (دەڵێتەوە) گوێگری زیاترە وەک لەوەی ئێمە گۆرانییەکی ڕەسەنی کوردی دەهێنین و هەر بە ڕەسەنی تازەی دەکەینەوە.

پرسیاری کاری نوێ و بەرهەمی تایبەتمان لە شاتوو کرد “هەمیشە پلانم هەیە و خەونم هەیە بۆ کارکردن بەڵام لە ئێستادا پێموایە دروستکردنی تراکی تایبەت بە خۆت وەک چاولێکەریی لێ هاتوە، منیش هەمیشە حەزم لە جیاوازییە. بۆیە نامەوێت ئەنجامی بدەم. بەڵام وەک ساڵانی ڕابردوو پلانی کار و کۆنسێرت و کلیپمان لەگەڵ گروپی موزیکی لوڕ هەیە.

 

 

چاوی خەڵک/ تایبەت

 

Leave a comment