بۆ یەکەمین جار ژنان لە بەڕێوەبردنی کاروباری “حەرەمی مەکە”دا بەشداری دەکەن

photo_2021-08-09_09-39-39

سەرۆکایەتی گشتی کاروباری “حەرەمی مەکە” لە سعودییە بۆ یەکەمین جار دوو ژنی وەکو یاریدەدەری سەرۆکی دەستەکە دەستنیشانکرد.

میدیاکانی سعودییە بڵاویکردووەتەوە کە هەریەک لە (عەنود عەبود و فاتیمە رەشوودش) ڕاسپێردراون وەکو یاریدەدەری سەرۆکی کاروباری حەرەمی مەکە دەستبەکاربن.

دەستبەکاربوونی ئەو دوو ژنە، هاوکاتە لەگەڵ گۆڕانکارییەکان لە کاروباری بەڕێوەبردنی “حەرەمی مەکە” و درووستکردنی ٢٥ ئاژانسی تایبەت بە پێشکەشکردنی خزمەتگوزاری بە گەشتیاران.

پێشتر هیچ ژنێک لە بەڕێوەبردنی کاروباری “حەرەمی مەکە” بەشدار نەدەبوو، بەڵام ماوەیەک پێش ئێستا عەبدولرەحمان عەبدولعەزیز سدیس، سەرۆکی کاروباری حەرەمی مەکە ڕایگەیاند هەوڵ دەدەن نزیکەی ٢٠ ژنی خاوەن بڕوانامەی ماستەر و دکتۆرا لە بەڕێوەبردنی کاروبارەکاندا بەشداری پێ بکەن.

ئەمەش تەریبە لەگەڵ کرانەوەی تێڕوانینی دەسەڵاتی سعودییە بەرانبەر بە پرسە جیاوازەکان و لەناویشیاندا پرسی ژنان.

پێشتریش محەمەد بن سەلمان شازدەی جێنشینی سعودییە، لە چەند بڕیارێکی جیاوازدا ڕێگەی بە ژنان دا شۆفێری بکەن و کارکردنی بە سەرجەم ئەو فەرمودانەش ڕەتکردەوە کە پێچەوانەی تێگەیشتنە عەقڵییەکانن.

 

 

Leave a comment