ژنێکی ڕزگاربووی دەستی داعش لە ساڵڕۆژی ڕفاندنیدا گیانی لەدەستدا

photo_2021-08-04_22-58-31

دوای نیوەڕۆی ئەمڕۆ چوارشەممە ڕێکەوتی ٤ـی ئابی ٢٠٢١، ژنە ڕزگارکربوویەکی دەستی داعش بەهۆی ڕووداوێکی هاتوچۆ لەسەر ڕێگای سەرەکی کۆمەڵگای بۆرکی سەر بە ناحیەی سنونێ لە باکووری قەزای شنگال  لە ساڵیادی ڕفاندنی گیانی لەدەستدا.

فەریدە ئەلیاس، ٢٩ ساڵان ڕزگاربوویەکی دەستی داعشە، دوو منداڵی هەیە. لە کاتی هێرشی ڕێکخراوی تیرۆرستی داعش بۆ شنگال لەگەڵ دوو منداڵ و هاوسەرەکەی دەستبەسەر دەکرێن و دەبرێن و تا ئێستاش چارەنوسی هاوسەرەکەی دیار نییە.

مەلۆ شەمۆ  یەکێکە لە کەس وکاری فەریدە دەربارەی ڕووداوەکە  بە (چاوی خەڵک)ی وت “نازانم بەچی مەبەستێک لەماڵ ڕۆشتۆتە دەرەوە و لەکاتی شۆفێریدا لەسەر ڕێگای سەرەکی بۆرکی توشی ڕووداوەکە بووە و بەهۆی سەختی برینەکەی و دوای ڕەوانە کردنی بۆ نەخۆشخانەیەکی دهۆک گیانی لەدەستدا.”

هەروەها ئاماژە بەوە دا “فەریدە پاش ڕزگاربوونی لە دەستی تیرۆریستانی داعش لەگەڵ هەردوو منداڵەکەی لە کۆمەڵگای بۆرک دەژیان و لەگەڵ ڕێکخراوێک ئیشی دەکرد و بەو شێوەیە خێزانی خۆی بەخێو دەکرد.”

ئەم ڕووداوەش لە کاتێکدایە کە دوێنێ ٣ـی ئاب ، ساڵڕۆژی پەلاماردانی ئێزیدییەکانی قەزای شنگال بوو لەلایەن داعشەوە کە فەریدەش لەو کاتەدا لەگەڵ هەردوو منداڵەکەی و هاوسەرەکەی لەلایەن چەکدارانی ئەم ڕێکخراوە تیرۆریستییە ڕفێندرابوون.

 

 

 

چاوی خەڵک / تایبەت

Leave a comment