بەهار موونزیر
تەنیا نەزان و بێ ئاگاکان ”کچە مۆدێلیستەكانی کوردستان” بە بەرهەمی کاری بزووتنەوەی ژنان دەزانن، لە کاتێكدا ئەم کچانە بەداخەوە قوربانی دەستی پیاوانی ناو حزب و کۆمپانیاکانە، واتە پیاوە دەوڵەمەند و نیمچە دەوڵەمەندە پیاوسالارەکانەوە، بوونەتە بوکەڵە و هەر ڕۆژەی لەبەر ئارەزووی ئەوان (لچیان بۆ زل دەکەن و لەشولاریان بۆ نەشتەرگەری دەکەن، لە پارەی سەر سفرەی خەڵکی هەژارو کەمدەرامەت)، بەشێك لەمانە بە فرۆکەی تایبەتی بەرپرسەکان دێن و دەچن، لەملاشەوە کۆنەپارێزان بە هەمان شێوە دەیانکەنە بەرهەمی کاری بزووتنەوەی ژنان، لە کاتێکدا ئەمە گەورەترین زیان دەدات لە هۆشیاری ژن و کۆمەڵگە لەسەر یەکسانی و یەکسانی جێندەری لە کوردستاندا.
بەرهەمی سیستمی سەرمایەداری و دنیای بازاڕی گەرمی بازرگانانن، زۆر هەوڵی ئەوە هەیە کە ئێمە بکەنە هۆکار بۆ ئەم پرسە گەورەیە، کە بازاڕێکی گەورەی ناوخۆیی و ناوچەیی و هەتا جیهانیشی لە پشتە ئەویش بە کاڵاکردنی ژنانە.
پێموایە دەبێت ئەركی هەر كەسێكی یەكسانیخوازبێت، كە بەر بەم شەپۆلە بگرێت؛ هەم لە كاڵاكردنی ژنان و هەمیش لەو چەواشەكارییەی كەسانێكی ناخ ڕەش، دەرهەق بە ژنان و ڕێكخراوە فیعلییەكانی ژنان، مادام كچانی مۆدێلیست- تا ئاستێك لە حاڵەتەوە بووە بە دیاردە و هەر ڕۆژەی كەسێك هەڵدەتۆقێت، گرنگە قسەی جددی لەسەر بكرێت و، هۆشیاریی لەم بارەیەوە بڵاوبكرێتەوە.
