16 گۆڕی شەهیدانی ساڵی 2014 لە شنگال هەڵدرایەوە

197903621_972687330172557_4056519269175123080_n

شەوی ڕابردوو 8ی حوزەیرانی 2021، بەڕێوەبەرایەتی پۆلیسی شنگال کردنەوەی 16 گۆڕی شەهیدانی پێکهاتەی ئێزیدی ڕایگەیاند بۆ ئەوەی بنێرن بۆ بەغدا بۆ دیاریکردنی ناسنامەیان کە لە ئەنجامی هێرشی تیرۆرستانی داعش بۆ سەر شنگال و دەوروبەری شەهید کرابوون.

ناتق عەلۆ بەرپرسی ڕاگەیاندنی پۆلیسی قەزای شنگال تایبەت بە “چاوی خەڵک” ڕایگەیاند، ”لە مانگی ڕابردوو و تا ئێستا بنکەی پۆلیسی شەنگالی سەر بەبەڕێوەبەرایەکەمان بەهەماهەنگی لەگەڵ فەرمانگەی تەندروستی نەینەوا / بەشی پزیشکی دادوەری، 16 گۆڕی شەهیدانی پێکهاتەی ئێزیدی هەڵداوەتەوە کە لەڕووداوەکانی تیرۆریستانی داعش لەناوچە جیاجیاکانی قەزای شەنگال شەهید بوون“.

 

 

هەروەها ئاشکرای کرد، “مەبەست لەم هەڵدانەوەیە ناردنی تەرمەکانیانە بۆ پزیشکی دادوەری لەبەغدادی پایتەخت بەمەبەستی ڕێکخستنی بڕوانامەی مردن بۆیان و تەواوکردنی ڕێکاری یاسایی و وەرگرتنی مافەکانیان وەکو هەموو شەهیدانی تر”.

“پێشبینی دەکرێت لەو ژمارەیە 7 تا 8 کەس لە ڕەگەزی مێ بن کە لە ئەنجامی هێرشی تیرۆرستانی داعش دا شەهیدکرابوون“. ناتق عەلۆ وای وت.

 

 

لە سێی تەباخی ساڵی 2014 و لە ئەنجامی هێرشی تیرۆرستانی داعش دا بۆ سەر قەزای شنگال و ناحیەی گرعزێر لە ڕۆژئاوای پارێزگای نەینەوا بە هەزاران کەس بوونەتە قوربانی چی لەلایەن ئەو ڕێکخراوە تیرۆرستیەوە شەهید کرابن یاخود ڕفێندرابن کە بەپێی ئامارەکان تا ئێستاش نزیکەی 80 گۆڕی بە کۆمەڵ لەو سنوورە دۆزرایەوە.

 

چاوی خەڵک/ تایبەت

Leave a comment