خۆشەویستی بوو بە چەکی من

photo_2020-10-07_12-13-51

دوابه‌دوای هه‌وڵی تیرۆرکردنەکەی لە بەرەبەیانی ٢٥ی جولای ٢٠٢٠دا لە لاپەڕە فەیسبۆکییەکەی خۆی‌دا نووسی: ” له‌ مه‌رگ ناترسم، له‌ مردن نه‌تۆقیوم، چونکه‌ مرۆڤ‌بوون و بیرکردنه‌وه‌ له‌ مرۆڤ له‌ مندا زیندووه‌. باکم نیه‌ له‌م شه‌به‌یخوونه‌ی شه‌مشه‌مه‌کوێره‌کان‌، چونکه‌ هێلانه‌ی من له‌کن هه‌ڵۆکانه‌. مه‌رگ جلێکه‌ به‌ باڵای هه‌ر هه‌موومان دووراوه‌. له‌ پێناوی گەل و ئه‌ویندارانه‌ چوون به‌ پێشوازیی ئه‌م حه‌تمیه‌ته‌وه‌، ژیان هه‌رمان و دره‌وشاوه ده‌کات‌. ده‌زانم مانه‌وه‌ی هزر و ئه‌ندێشه‌کانی من و ئێمه‌،  ده‌بێته‌ هۆی تیاچوون و فه‌وتانی سته‌م و تاریکی؛ که‌وابوو بیشمانکوژن، چ ده‌که‌ن له‌ ئه‌ندێشه‌مان؟ ئێمه‌ به‌ ناوی ژیانەوە، ده‌مێنینه‌وه‌ و ده‌جه‌نگین.”

چالاکییه مرۆییه‌‌کان و خه‌باتی چه‌ندین ساڵه‌ی بەدژی ده‌مارگرژی و ڕە‌گه‌زپه‌رستی ئه‌م ئه‌ندام پارلەمانە کوردە له‌ سوید؛ ‌ده‌مێ ساڵه‌ تیرۆریستان دەیانەوێت بیکەنە نێچێر. هه‌ر بۆیە، چه‌ند جارێک له‌سه‌ر هه‌ڵوێسته‌کانی به‌ره‌وڕووی هه‌ڕە‌شه‌ بۆ‌ته‌‌وه، جاروبار‌ نووسینه‌کانی‌ به‌ ئیسلامۆفۆبیا تەعبیر کراوە و دوایین جاریش هاوینی ئه‌مساڵ له‌ هێرشێکی تیرۆریستی‌دا بۆمبێکی ده‌ستکردیان خسته‌ ناو ماڵه‌که‌یەوە و ئاماژەکان وا نیشان دەدەن کاری کۆماری ئیسلامی ئێران بووببێت بۆ له‌ناوبردنی.

خاتوو “سوهه‌یلا داودیان که‌لهوڕ” ناسراو به‌ “سوهه‌یلا فۆرش” ساڵی ١٩٦٦ له‌ شاری “گێڵان ‌غه‌رب”ی پارێزگای کرماشان له‌دایک بووە و ئێستا ئەندامی پەرلەمانی سویدە، ئەندامی سەرکردایەتی و بەرپرسی ڕێکخراوی ژنانی حیزبی “دیمۆکرات‌ مەسیحیی” سوید، ئه‌ندامی لیژنه‌ی دامه‌زرێنه‌ری ڕێکخراوی جیهانی کورد‌ (WKO)،‌ نووسه‌ر، خێرخواز و چالاکوانی مافی مرۆڤە.

له‌ کاتی پڕوپاگه‌نده‌ی هه‌ڵبژاردنی ٢٠١٩ی پەرلەمانی ئەوروپا سه‌رۆکی حیزبی دیموکرات مه‌سیحی سوید له‌ دیمانەیەکی تەلەڤیزیۆنیدا سه‌باره‌ت به‌ سۆهەیلا فۆرش وتی: “نموونه‌ی ژنێکی تێکۆشه‌ر و ده‌رکه‌وتووه‌ له‌ زۆر بواردا، نابێ تێکۆشانه‌ به‌رچاو و کاریگه‌ره‌کانی ئەومان ‌بیربچێ که‌ به‌رده‌وام کاری بۆ یه‌کسانی و مافی مرۆڤ کردووه‌. ئێمه‌ پێویستمان به‌ بوونی پەرلەمانتاری وه‌کوو ئه‌و هه‌یه له‌ ناو یەکێتیی ئه‌رووپادا.‌”

خۆشی لە لێدوانێکدا دەڵێت: “به‌ دوور له‌ هه‌ر چه‌شنه‌ میرات و یارمه‌تییەکی بنه‌ماڵە‌، لە غەریبی و له‌ خاڵی سفره‌وه‌ ده‌ستم داوەتە کار و چالاکییە دڵخوازەکانم. گرفته‌ جۆراوجۆره‌کانی ژیانی په‌نابه‌ری نەیانتوانی ڕێگەی پێشکەوتن و پێگەیشتنم لێ ‌بگرن و قۆناغە دژوارەکانی بەردەم ژیانم بڕیوە و لەسەر ڕە‌نج و تێکۆشانی خۆم به‌م پێگه‌یه‌ گه‌یشتووم.”

ئه‌م ژنه‌ چالاکه‌ کورده‌ چه‌ند ساڵێک دوای مه‌رگی باوکی، له‌ ساڵی ١٩٩٣ی زاینی‌دا به‌ هۆی دۆخی ناله‌بار و باری ئەمنییەتیی ژیانی ئەوکات و چالاکیی سیاسی و نزیکایەتی لەگەڵ ڕه‌وته‌ چه‌په‌کان‌دا، هه‌رده‌م مه‌ترسی گیران یا کوشتنی له‌ لایه‌ن هێزە ئەمنییەتییەکانی کۆماری ئیسلامییه‌وه‌ له‌سه‌ر بووە. بۆیه‌ بە ناچاری ڕووی له‌ هه‌نده‌ران کردووه‌ و لە کۆتایی‌دا لە وڵاتی سوید گیرساوەتەوە، خۆیشی لەو بارەیەوە دەڵێت: “کاتێک ناچار بووم ئێران بەجێ‌بهێڵم، ته‌نیا جانتایه‌ک و دوو مناڵه‌که‌مم پێ‌بوو،‌ له‌ غوربه‌ت‌دا ژیانێکی هەرە دژوار و ژاناویم ئه‌زموون کرد؛ به‌تایبه‌ت یەکەم ساڵەکان. پاش ماوه‌یه‌کی که‌م هاوسه‌ری‌ پێشووم به‌جێی‌هێشتم و من مامه‌وه‌ و دوو منداڵ، له‌ نێوان دوو فه‌رهنگی جیاوازدا. ده‌بوو یان داماوی، لاوازی و بێ‌ ده‌سه‌ڵاتی قبووڵ بکەم و ته‌سلیمی ئاستەنگەکان و کێشه‌کان بم یان هه‌ستمه‌وه و خۆم لەم دۆخە ڕزگار بکەم‌. به‌ڵام من بڕیارم‌دا ڕابم و‌ وه‌ک ژنێکی عه‌شایر ئه‌سپه‌که‌م زین بکه‌م و به‌ ئیراده‌ و شێلگیری به‌ره‌وپێش بچم و چاره‌نووسم بگۆڕم.”

سوهه‌یلا فورش، ئه‌زموونێکی شیاوی له‌ ئێش و ئازاره‌کانی خۆی وه‌رگرتووه‌ و کردوونی به‌ سه‌کۆیه‌ک بۆ یارمه‌تیدان به‌ خه‌ڵک. دەرەنجامی ئە ماندوو بوون و هەوڵدانەی لە هیچەوە وای کرد کە وەک خۆی دەڵێت سه‌ره‌ڕای ئه‌وه‌ی که‌ کوردێکی ئاوارەیە و خەڵکی سوید نییە، لە ڕێزی ئەو کەسانەدا بێت کە “له‌سه‌ر ئێستا و داهاتووی وڵاتی سوئێد بڕیار ده‌ده‌م. جا مادام من توانیومه‌ سه‌رکه‌وتوو بم، که‌وابوو که‌سانی‌تریش ده‌توانن سه‌رکه‌ون به‌ مه‌رجێک بیانه‌وێت و داخوازییه‌کانیان بچووک نه‌بێ.”

ساڵی ٢٠٠٥ و لە درێژەی هەوڵە مرۆڤ‌دۆستانەکانی‌دا لە وڵاتی سویدەوە گه‌ڕایه‌وه‌ بۆ باشووری کوردستان و ماوه‌ی سێ ساڵ له‌ باشوور مایەوە و کۆمه‌ڵێک چالاکیی ژینگه‌پارێزی به‌ مه‌به‌ستی سه‌وز هێشتنه‌وه‌ی کوردستان به‌ چاندنی نه‌مام ئه‌نجام داوه‌ و وەک کارێکی خێرخوازیش قوتابخانه‌یه‌کی بۆ خوێندنی قوتابییه‌ هه‌ژاره‌کان کردۆته‌وه‌.

پاشان، هه‌ر له‌وێ “ڕێکخراو‌ی خاتوون”ی بنیاتنا‌ که‌ دامه‌زراوه‌یه‌کی خێرخوازیی فره‌ڕە‌هه‌نده‌ بۆ یارمه‌تیدانی خه‌ڵکی هه‌ژار و ده‌سگرۆیی و په‌نادانی ژنانی هه‌تیوبار و ئافره‌تانی قوربانیی تووندوتیژی و پشتگیری و یارمه‌تیدانیان بۆ گه‌ڕانه‌وه‌ بۆ ناو کۆمه‌ڵ و ده‌سپێکردنه‌وه‌ی ژیانی ئاسایی.

له‌ کاتی شه‌ڕی داعشدا به‌ ڕێکخستنی که‌مپه‌ین و کۆکردنه‌وه‌ی یارمه‌تی، خزمه‌تێکی به‌رچاوی به‌ لێقه‌وماوانی شەنگال و کۆبانێ له‌ باشوور و ڕۆژاوای کوردستان کردووه‌. پاش بوومه‌له‌رزه‌که‌ی ساڵی ٢٠١٧ی کرماشان و سەرپێڵ‌زەهاو و گوندەکانی ئەو دەڤەرە، که‌مپه‌ینێکی به‌ ناوی که‌مپینی زاگرۆسی زامدار وه‌ڕێخست و یارمه‌تییه‌کی به‌رچاوی بۆ‌ ماڵوێرانه‌کانی ئه‌و کاره‌ساته‌ کۆکرده‌وه‌.

ساڵی ٢٠٠٩ ڕێکخراو‌ی‌ خاتوونی لە سویدیش تاپۆ کرد که‌ به‌ یه‌که‌مین ناوه‌ندی یارمه‌تیدانی ژنانی په‌نابه‌ر له‌ وڵاتی سوئید هەژمار ده‌کرێت. ئێستا ڕێکخراوی خاتوون جگە لە شاری دهۆک لە باشووری کوردستان، له‌ هه‌شت شاری جیاجیای وڵاتی سویدیش‌دا بنکەی هەیە و چالاکە. ڕێکخراوی خاتوون گەورەترین ناوه‌ندی خزمەت‌کردنی ژنانی پەنابەرە لە ئەسکەندەنافیا و بڕیار وایه‌ لقه‌کانی لە وڵاتانی نەرویج و فەڕەنساشدا دابمەزرێنێت.

سوهەیلا بڕوای وایه‌‌ که‌: “دابه‌شکردنی مرۆڤه‌کان به‌سه‌ر ڕه‌نگ و نژاد و ڕه‌گه‌زدا، ئه‌ندێشه‌یه‌کی ته‌ندروست نییە. مرۆڤه‌کان یەکسانن و ئه‌وه‌ ڕاهێنان و هه‌ڵاواردنه‌ که‌ ئه‌وان ده‌کاته‌ توێژی تایبه‌ت له‌ کۆمه‌ڵگادا.

سوهه‌یلا ساڵی ٢٠١٤ لەسەر لیستی حیزبی دێمۆکرات‌مەسیحی وەک ئه‌ندامی جێگر چووه‌ ناو پارلمانی سویده‌وه‌ و ساڵی ٢٠١٨ له‌ دوایین هه‌ڵبژاردنی پارلمانی سویددا به‌ ئه‌ندامی سەرەکیی پارلمانی ئه‌م وڵاته‌ هه‌ڵبژێردرا و ساڵی ٢٠١٩ چووه‌ ناو ده‌سته‌ی به‌ڕێوه‌به‌رایه‌تی حیزبی دێمۆکرات‌ مەسیحیی سویده‌وه‌.

سوهه‌یلا به‌ هۆی چالاکییه‌ مرۆڤدۆستانه‌کانی، له‌ لایه‌ن ده‌زگا‌کانی ڕاگه‌یاندن و ناونده‌ حکومی و کۆمه‌ڵایه‌تییه‌کانی سویده‌وه‌ چه‌ندین ڕێزنامه‌ و دیپلۆمی شانازی و خه‌ڵاتی پێبه‌خشراوه‌ هەر لە خه‌ڵاتی “هێمای مرۆڤایه‌تی” له‌ لایه‌ن سه‌نته‌ری کڵێسه‌کانی سوید‌ Karlstads stift  تا هه‌ڵبژاردنی وەک “نموونەی ساڵ” له‌ لایه‌ن ڕۆژنامه‌ی “داگێن“ی سوئێده‌وه‌. هەروەها پاشای سویده‌وه‌ به‌ فه‌رمی بانگهێشتی کردووە و نازناوی “پره‌نسێسی ڕووناکی” پێ‌به‌خشیوە‌. هه‌روه‌ها کۆمه‌ڵێک خه‌ڵاتی دیکه‌شی وه‌رگرتووه‌، له‌وانه‌ “قاره‌مانی سوئید”، “سه‌فیری عه‌شق و خۆشەویستی” و”مارگاریتا لیزاراگا”.

ڕە‌هه‌ندێکی‌تری ژیانی سوهه‌یلا فورش لێکۆڵینه‌وه‌ و نووسینه‌کانیەتی. بە نمونە‌، ژیاننامه‌که‌ی به‌ ناوی “خۆشه‌ویستی بوو به‌ چه‌کی من”  که به‌ هاوکاری و پێداچوونه‌وه‌ی ئینگالیل بێرگێنستێنی ڕۆژنامه‌نووس به‌ زمانی سویدی، چاپکراوه‌ و پاشان وەرگێڕدراوه‌ بۆ سه‌ر زمانه‌کانی‌ ئه‌ڵمانی و داچ.

له‌ پشت هه‌ر په‌نجه‌ره‌یه‌که‌وه‌ دڵێک لێده‌دات” کتێبێکی‌تری خاتوو سوهه‌یلایه‌ که‌ باسی کێشه‌ی ئه‌و ژن و منداڵانه‌یه‌ که‌ به‌ هۆی هه‌ڵاواردنی ڕەگه‌زی و دۆخی خراپی ژیان له‌ وڵاتی خۆیان‌دا هه‌ڵدێن بۆ سوید به‌ڵام له‌وێش له‌ مافی به‌رابه‌ر و دیموکراتیک بێ‌به‌شن.

ڕۆمانێکیشی لەژێر ناوی “فرۆشراو“دا نووسیوه‌ کە بەسه‌رهاتی کچێکی ئێرانییە که‌ له‌ لایه‌ن باوکییه‌وه‌ که‌ تووشبووی ماده‌ هۆشبه‌ره‌کانه‌، ده‌فرۆشرێت به‌ تۆڕێکی مافیای سێکس و دواتر ده‌کرێته‌ کۆیله‌ی جنسی. به‌رگی دووهه‌می ئه‌م ڕۆمانه‌ له‌ ژێر چاپدایه.

خاتوو سوهه‌یلا پێیوایە: “بۆ ئه‌وه‌ی دەستمان بەو پێگەیە بگات کە دەمانەوێ یان ده‌بێ هەمانبێت؛  ئه‌رکی هه‌ر تاکێکی کورده‌ که‌ ده‌نگی کپکراوی نه‌ته‌وه‌که‌ی بگه‌یه‌نێ و ئه‌و غه‌درانه‌ی لێی‌کراوه‌ بۆ وڵاتانی جیهان و به‌تایبه‌ت ناوه‌نده‌کانی بڕیار له‌ ڕۆژئاوا، ئاشکرا بکات و هه‌وڵ بدات کێشه‌ی کورد بکاته‌ ڕۆژە‌ڤ.”

 

 

سەرچاوە: IranWire

 

Leave a comment