دیالۆگێکی کراوە “کوشتن بە ناوی شەرەف” لە سلێمانی و هەڵەبجە

IMG_2587

لە درێژەی کار و چالاکییەکانیدا ڕێکخراوی خەڵک بۆ گەشەپێدان لە هەردوو شاری سلێمانی هەڵەبجە هەستا بە ڕێکخستنی دیالۆگێکی کراوە بۆ بەرەنگاربوونەوەی توندوتیژی لەسەر بنەمای جێندەر “کوشتن بە ناوی شەرەف”

دەستپێکی چالاکیەکە بە ناساندنی کارو پرۆژەکانی ڕێکخراوی خەڵک بۆ گەشەپێدان(PDO) بە ڤیدیۆیەک دەستیپێکرد.

دواتر سورێن ئەبوبەکر بابەتی (خستنەڕوویەکی ئەکادیمی بۆ چەمکی کوشتن بەناوی شەرەف) خستەڕوو. دواتریش لە لایەن بەهار مونزیرەوە (کاری ڕێکخراوەیی لە لایەن کۆمەڵگەی کوردییەوە) خرایە ڕوو. پاش وەرگرتنی پشویەکی کورت. (شیکردنەوەیەکی یاسایی) لە لایەن پەرێزەری ڕێکخراوی خەڵک بۆ گەشەپێدان ئاشنا حەمەعەزیز پێشکەشکرا و دواتریش گفتوگۆ دەستیپێکرد.

ئەم چالاکیە بە ئامادەبوونی قائیمقامی چەمچەماڵ و نوێنەری یەکێتی زانایان و بەڕێوەبەری توندوتیژی دژی خێزان و ژنان لە سلێمانی، نوێنەری سەنتەرەکانی جێندەر، بەڕێوەبەری چاودێری کۆمەڵایەتی، نوێنەری  یەکەی سەرپەرشتیارانی توێژەران، نوێنەری دەستگا ئەمنییەکان و چەند لایەنی دیکە.

سورێن ئەبوبەکر بۆ چاوی خەڵک دوا: چۆن لە ڕووی ئەکادیمییەوە خوێندنەوە بۆ ئەم چەمکە بکرێت (شەڕەف). بە پوختی بناغەی کێشەکەم خستە ڕوو بۆ ئەوەی دیالۆگی لەبارەوە بکەین و ئاڵوگۆڕی بیر و ڕا بکەین.

لە بارەی ئامانجی چالاکیەکەوە سورێن وتی “گەیاندنی زانیارییەکان و بەشداریپێکردنی بەشداربووان لە چۆنیەتی داڕشتنەوەی پلان و ڕێکاری تایبەت بۆ ڕوبەڕوبونەوەی دیاردەی (کوشتن بە ناوی شەرەف) لە شوێنە جیاوازەکانی کوردستان، کە یەکێکە لەو کێشانەی ساڵانە تۆماردەکرێت و کاریگەری نەرێنی لەسەر کۆمەڵگە و خێزانی کورد جێهێشتووە”

هەروەها وتی “پی دی ئۆ بە باشی زانی دیالۆگێکی لەم چاشنە سازبدات و بیکاتە بەشێک لەو پرۆژەیەی لە داهاتوودا کاری لەسەر دەکات بۆ بەرەوپێشچوون و گەشەپێدانی هەموو لایەنە کولتوری و ئاینیی و کۆمەڵایەتی و یاساییانەی کە کاریگەرییان هەیە لەسەر دروستبوونی ئەم کێشەیە لە کۆمەڵگەدا.

تەواوی ئەم  چالاکییەکە لە سلێمانی و هەڵەبجە  نوسرایەوە و دواتر دەکرێتە ڕاپۆرت و دەنێردرێت بۆ UNFPA بۆ ئەوەی لە چورچێوەی ئەجێندایەکدا کاری لەسەر بکرێت.

بەهار مونزیر بەڕێوەبەری ڕێکخراوی خەڵک بۆ گەشەپێدان و ئامادەکاری پرێزنتەیشنی (کاری ڕێکخراوەیی لە لایەن کۆمەڵگەی کوردییەوە) بۆ چاوی خەڵک دوا “ئەم چالاکییەی ڕێخراوی PDO لە سلێمانی و هەڵەبجە ئەنجامدرا بۆ ئەوە بوو دەستبخەینە سەر ئەو کێشە و گرفتانەی لە بەڕێوەبردنی کەیسەکاندا دێتە ڕێمان.

هەروەها وتی “یەکێک لە گرنگییەکانی ئەم چالاکییە ئەوە بوو ئامادەبووان کەسانی تایبەت پەیوەندیدار بوون بەم بابەتەوە وەک لایەنەکانی حکومی و زانکۆ و تەندروستی و ئاینی و ڕێکخراوەکان. لەم دوو ڕۆژەدا توانیمان دەست بخەیەنە سەر کێشەکان”

لە بارەی گرنگییەکی دیکەی چالاکییەکەوە وتی”بۆ ڕێکخراوی PDO گرنگە کار شوێنە جیاوازەکاندا بکات و وەک سەرەتایەکیش هەڵەبجەمان دیاریکرد و لەوێش کەسانی زۆر دڵسۆز پشتیوانییان بۆ دەربڕین و پشتیوانی سەنتەری گەشە-یان کرد کە سەنتەرێکی ڕێکخراوی PDO یە لە شاری هەڵەبجە.

ئاشنا حەمە عەزیز بۆ چاوی خەڵک دوا “بابەتەکەی من بابەتێکی یاسایی بوو لەبارەی مادەی ١١١ ی ساڵی ١٩٦٩ و کارنەکردن بەو مادانەی کە یاساکە باسی کردوە. ئێمە وەک ڕێکخراو چۆن دەتوانین هاوکاری دادگا و داواکاری گشتی مەرکەزەکان بین.

لە بارەی ئامانجی ئەم چالاکیەوە وتی “دەمانویست ئەو کەسانە بدوێنین کە لە پۆستە گرنگەکاندان و زۆرێکیان کەیسەکانی کوشتن دێتە بەردەستیان، ئامانجمان بڵاوکردنەوەی هۆشیاری بۆ کەمکردنی دیاردەی کوشتن بوو، دەمانویست جێدەستی ڕێکخراوەکان نیشانبدەین لە چەندەها کەیسی جۆراو جۆردا بە تایبەتیش کەیسی کوشتن.

ئەم چالاکییە بەشێکە لە پرۆژەی (یەکسانی جیندەری و بە‌هێزکردنی ژنان) لە سلێمانی لەلایەن سەنتەری ئایان لە سلێمانی و لە هەڵەبجەش لە لایەن سەنتەری گەشەوە بە پاڵپشتی ڕێکخراوەکانی SWEDO  و UNFPA و لە ماوەی دوو ڕۆژدا بەڕێوەچوو.

 

 

چاوی خەڵک/ تایبەت

Leave a comment