پاش حەوت ساڵ بێدەنگی, شاکارێک!

195438235_2888050821411104_3707903114766897025_n

پاش ماوەی 7 ساڵ بێدەنگی، خانمە هونەرمەندی كورد (کانی) بە ئەلبوومی “ببارێ” گەڕایەوە نێو کاری هونەریی و گۆرانیگوتن. کاری موزیک و دابەشکردنی سەرجەم گۆرانییەکان لەلایەن هونەرمەند کارزان مەحموودەوە بۆ کراون. 

هونەرمەند، تارا بورهان دەڵێت: ئەلبومەکەی کانی تەواو جیاوازە لەسەرجەم کارەکانی پێشووی، ئەتوانم بڵێم ئەم بەرھەمانە تازەگەرییە بۆ نێو مۆسیقاو گۆرانی کوردی.

کانی هاوسەری هونەرمەند کارزان مەحمودە و چەندین ساڵە پێکەوە کاری هاوبەش دەکەن و کۆتا کاریان پێش حەوت ساڵ ئەلبوومی “بێ تۆ” بوو کە ئەوکات دەنگدانەوەیەکی زۆری هەبوو.

هونەرمەند بڕیار ئیسماعیل دەربارەی دوا ئەلبومی کانی دەڵێت: یەکێک لەکۆڵەکە بەهێزەکانی میللەتێک هونەر و کلتورەیەکەتی. هونەر و کلتوریش سۆفت پاوەرە، هەمو هەنگاو و جوڵەیەکیش پێویستە لە خزمەتی سۆفت پاوەردا بێت. ئەم نەرمە هێزە کاری چەند هێندەی سوپا و ئابوریمان بۆ دەکات. گەر هێزمان نیە، گەر ئابوریمان لاوازە، گەر بە دوژمن تەوق دراوین و ئایدۆلۆژیای تاریکبین لە ناوەوە بنکۆڵمان ئەکا؛ هەمیشە (هێزی نەرم) ڕێگا ڕاستەکەیە و بەدیلە بۆ بەردەوام بون.

هەروەها دەڵێت: “ئەم ئەلبومە چونە ناو قۆناغێکی نوێی دروستکردن و داڕشتنی گۆرانی کوردییە لە باشور، خۆ دۆزینەوەیە لەناو ژانر و ستایلە هەمەڕەنگەکانی موزیک و بەسەردەمی بون و کواڵتی بونی گۆرانی کوردیە.”

ئەلبوومی “ببارێ”ی هونەرمەند کانی، لە 10 گۆرانی پێکهاتووە و سپۆنسەری سەرەکی ئاسیاسێڵە. دوێنێ ٢/٦/٢٠٢١ لە رێوڕەسمێکی تایبەتدا، لە هۆتێل گراند میلینیۆمی شاری سلێمانی بە ئامادەبوونی هونەرمەندان و هەوادارانی، ئەلبوومەکە بڵاوکرایەوە.

 

وێنەی کانی لەسەر ڕوپەڕی ئەلبوومی ببارێ

 

 

 

چاوی خەڵک/ تایبەت

Leave a comment