ڕێکخراوی ئیمێرجنسی ؛ ٢٥ ساڵە لە کوردستان خزمەتی کەمئەندامان دەکات

٢٥ ساڵ پێش ئێستا، یەکەمین نەخۆشخانەی ئیمێرجنسی لە سلێمانی لەلایەن ڕێکخراوێکی ئیتاڵی دروستکرا. مەبەست لە دروستکردنی دەگەڕێتەوە بۆ هەستکردن بە تاوان و کەمئەندام بونی هاوڵاتیان بەهۆی مین، چونکە مەزندە دەکرا ١٠- ١٥ میلیۆن مین لە کوردستان هەبێت کە زۆربەیان ئیتاڵی بوون.

هاوار مستەفا بەڕێوەبەری گشتی ڕێکخراوی ئیمێرجنسی لە سلێمانی دەڵێت” ١٩٩٥نەخۆشخانەی ئیمێرجنسی لە سلێمانی لەلایەن جینۆ سترادا پزیشکی نەشتەرگەری دڵ لە ئیتاڵیا دروستکرا، دوای ساڵێک یەکەمین نەخۆشمان لە سلێمانی وەرگرت ١٢ ساڵ بوو.”

هەروەها وتی” ئەو سەردەمە خەڵکێکی زۆر دەست و قاچی بەهۆی مینەوە دەپەڕی، ڕێژەی نەخۆش زۆر بوو، بۆ ئەوەی هاوسەنگی ڕابگرین لە ١٩٩٧ نەخۆشخانەیەکی ترمان لە هەولێر کردەوەکە تەنها برینداری تۆپ و فیشەک و مینمان وەردەگرت.”

 

 

هاوار مستەفا دەربارەی بیرۆکەی دروستکردنی پەلی دەستکرد بۆ چاوی خەڵک دوا”بەڕێوەبەری جێبەجێکار د.جینۆ سترادا بڕیاریدا بەشی پەلی دەستکرد بکاتەوە بەمەبەستی گەڕاندنەوەی ژیان بۆ ئەو کەسانەی ئەندامێکی جەستەیان بەهۆی مینەوە لەدەستداوە، تا بتوانن کاری ڕۆژانەیان بەڕێوە ببەن.”

ئەو پزیشکانەی چارەسەر بەرکەوتوانی جەنگ دەکەن لە جیهاندا ژمارەیان زۆر کەمە، تیمێکی ١٢ کەسی ١٩٩٠هاتن، ساڵێک لە سلێمانی بوون ڕاهێنانیان بە تیمێک لە کارمەندانی کورد کرد، لە ١٩٩٩ لە ئەفغانستان نەخۆشخانەیەکی تر لەلایەن ڕێکخراوی ئیمێرجنسیەوە دروستکرا، بەهۆی لێهاتوویی ئەم تیمە کوردەوە توانرا وەک ستافی ئینتەرناشناڵ ڕەوانەی ئەفغانستان بکرێن بۆ ئەوەی ڕاهێنان بە ستافی نەخۆشخانەکە بکەن، وە سەرکەرتوو بوون لە ڕاهێنانی کارمەندانی نەخۆشخانەی ناوبراو.

 

فارس حەمە عەبدوڵڵا، بەڕێوبەری مەڵبەندی ڕاهێنانەوەی فریاگوزاری لە سلێمانی دەڵێت” کاتێک کەمئەندامێک  سەردانی مەڵبەندەکەمان دەکات، تێکڕای خزمەتگوزارییەکان دەخرێتەخزمەتییەوە هەر لە چارەسەری سروشتی و دەروونیەوە تا دەگاتە دابینکردن و بەستنی پەلی دەستکرد و پاڵپشت، پاشان لە ڕێگەی پرۆگرامی ڕاهێنانەوەی پیشەییەوە کەمئەندامەکە دەگەڕێنینەوە ناو کۆمەڵگە وەک تاکێکی پر سود بۆ خۆی و خانەوادەکەی بە پیشەیەکی نوێوە کە گونجاو بێت لەگەڵ دۆخی کەمئەندامیەکەی.”

هەروەها دەڵێت” دابین کردنی سەرجەم پێداویستی پیشە لەگەڵ دابینکردنی کرێی دوکان بۆ ماوەی سێ مانگ ئەم سەنتەرە لە ئەستۆی خۆی دەگرێت. بەڵام ئەم خزمەتگوزارییە هەموو کەس ناگرێتەوە، بۆ نمونە مامۆستایەک ئەرک و پیشەی هەیە دوای ڕاهێنانی دەرونی جەستەیی و دابینکردنی پەلی دەستکرد دەتوانێت بچێتەوە سەر کارەکەی.”

 

 

فارس حەمە دەڵێت”پێشینەی دامەزراندن لەکاتی پێویستبوون بەکارمەندی نوێ لای ئێمە کەمئەندام و ڕەگەزی مێیە پاشان کەسێکی ئاساییە. لێرە ٢ کارمەندمان هەیە هەردوو دەستیان و یەک کارمەندیشمان دەستێکی نییە، بەڵام کارەکانی خۆیان زۆر بە ڕێک و پێکی دەکەن، هەروەها زۆربەی مامۆستاکانی ڕاهێنانەوەی پیشەی کەمئەندامن ئەمەش سوودی زۆرە لە ڕووی دەرونییەوە بۆ کەمئەندامەکان، چونکە کاتێک دەبینێت مامۆستاکەی کەمئەندامە سەرنجی ڕادەکێشێت و خێراتر دۆخەکەی ئاسایی دەبێتەوە، کارمەندەکەش کە کەمئەندامە ڕاستەخۆ لە هەستی کەمئەندامەکە تێدەگات.”

لەماوەی شەش مانگ سەنتەری پەلە دەستکردەکان لە سلێمانی دروستکرا، پاشان لە سۆران و دهۆکیش کرایەوە، لە ٢٠٠٥ ڕادەستی حکومەتی هەرێم کران. ئەو کەسانەی پەلی دەستکردیان بۆدروست کراوە بۆ ئەوەی بگەڕێنەوە ناو کۆمەڵگە پێویستبوو فێری کارێکی تازەبن، چەند وەرشەیەک لەناو سەنتەرەکە کرایەوە وەک دارتاشی، ئاسنگەری، درومان، چەرم، فەرش چنین، پیڤیسی و کڵاش چنین. کە لەێستادا تەنها ٤ وەرشەیان چالاکە و گونجاوە بۆ بازاری کار، ئەوانیش: بەرگدوورین سەراجی دارتاشی و ئیشی ئیش و کاری پلاستیکە(پی ڤی سی).

 

شەرمن خالید تەمەنی ٤٠ ساڵە و دانیشتوی ناحیەی سەیدسادقە، لەتەمەنی ٤ ساڵیدا لەشەڕی ئێران- عێراق پارچەی تۆپ بەردەستی دەکەوێت و بەو هۆکارە دەستی دەبڕدرێتەوە.

شەرمن دەڵێت” ماوەی چەند ساڵێکە گیرۆدی ئازار بووم تا ئێستا ١٤ نەشتەرگەری بۆ ئەو دەستەم کراوە. بۆ ئەوەی چارەسەر بکرێت پێویست بوو دەستێک دروست بکەم، ئەمڕۆ هاتوم ئەو دەستەی بۆیان دروست کردوم وەری بگرمەوە. لە ٢٠٠٩  هاتم بۆ ئێرە بەشداری خولی درومانم کرد بۆ ٥ مانگ و بڕوانامەم وەرگرت لەو بوارە، ئێستا بە پێێ پێویست لە ماڵەوە کاری درومان دەکەم.”

یەکێکیتر لە بەرنامەکانی ئیمێرجنسی کردنەوەی نەخۆشخانەیەک بوو لە سودان بۆ چارەسەری دڵ، توانراوە زیاتر لە ٩٠ نەوەد منداڵی کورد لە سودان سوود لەو بەرنامەیە وەربگرن و چارەسەر بکرێن.

 

 

ئەکرەم ئیبراهیم، سودمەندێکی تری نەخۆشخانەی ئێمێرجنسییە و دەڵێت” دانیشتوی دەربەندیخانم لە ساڵی نەوەدەکان قاچم بە مین قرتا، لەو کاتەوە من خاوەن پێداویستی تایبەتم و چەند جارێک قاچم دروست کردوە، پێویستیم بە قاچێکیتر هەبوو، بۆیان دروست کردومەوە و  ڕاهێنانی لەسەردەکەم.”

هەروەها وتی” هەر جارێک هاتوم زۆر باش بوون لەگەڵم، زۆر ئاسودەین لەگەڵیان، کاتێک پەلی دەستکرد بۆ دروست دەکرێت دەبێت ڕاهێنان بکەین تا ئەو کاتەی لەگەڵی ڕادێین و ئاسودە دەبین لەگەڵی ئەوکاتە وەریدەگرینەوە ڕێ پێدەکەین.”

بەپێ راپۆرتی ١٩٩٨ -٢٠٢٠ ژمارەی ئەو کەسانەی لە مەڵبەندی ڕاهێنانەوەی ئیمێرجنسی تۆمار کراون و سودیان لە خزمەت گوزاریە جۆراو جۆراکانی وەرگرتوە بەم شێوەیەیە:

ژمارەی کەمئەندامی تۆمار کراو ٦٤٨١
نێر ٥٥٩٣
مێ ٨٨٨
وەرگرتنی چارەسەری سروشتی ٥٧٩٠٣
چاککاریی ٢٦٦٤٣
ژمارەی پەلی دەستکردی پێشکەشکراو ١٢٤٥٤
چاکسازی خانوبەرە بۆ خاوەن پێداویستی تایبەت ٩٨
ژمارەی خولەکان ٣٨
بەشداربوان ٥٩٩
وەرشەی هاریکاری ٣٨٦
سودمەندی ڕاستەوخۆ ٤٩٥
سودمەندی ناڕاستەوخۆ، واتە خێزانەکەی ١٨٦١

 

 

مەڕوا بەهجەت، سودمەندبویەکی تری نەخۆشخانەکەیە، بۆ چاوی خەڵک دوا ” لە ٢٠٠٧ەوە سەردانی ئێرە دەکەم، لەو ساڵەدا سەیارە لێیدام، قاچێکم بڕایەوە، زۆر سوودم لەم سەنتەرە وەرگرت، کاتێک ئەو ڕوداوەم بەسەرهات وتم ناتوانم جارێکیترە هەڵبستمەوە و بچمەوە خوێندنگە.”

هەوەها دەڵێت” دوای ماوەیەک هاتم قاچیان بۆ دروست کردم، شێوازی ڕا‌هێنانەکان زۆر باش بوو، تا لەگەڵ ئەو قاچە ڕاهاتم هەموو ڕۆژێک ڕهێنانیان پێدەکردم، وام لێهات زۆر بەلامەوە ئاسایی بوو، ئەمڕۆ بۆ ئەوە هاتم چاکسازی بۆ ئەو قاچەم بکەم گرفتێکی تێدابوو، من ئێستا خوێندکاری پۆلی پێنجم و لەخوێندن دانەبڕاوم.”

لە ٣٠%ی کارمەندەکانی ڕێکخراوی ئیمێرجنسی سلێمانی خاوەن پێداویستی تایبەتن و بەرنامە و کاریان بەردەوامە، کارمەندانی مەڵبەندەکە بەو هیوایەن ڕۆژێک زیاتر بمێنێتەوە، تا خزمەتی زیاتر بکەن، ئەم ڕێکخراوە بۆ ئەوەی بگات بەم ئاستەی ئێستای پاڵپشتی زۆری لەلایەن حکومەتی هەرێمی کوردستان و خەڵکی دڵسۆز و ڕۆشنبیر لێ کراوە.

 

 

چاوی خەڵک / تایبەت

Leave a comment