نور دوای تەواوکردنی کۆلێژ بە خەونەکەی دەگات

101008868_1184931955178163_2578130376568340480_n

 

نور موحسینی ٢٥ ساڵان، دەرچوی کۆلێژی ئەندازیاری میکانیکە ئێستا لە ڕێگەی وێنە کێشانەوە خاوەنی پڕۆژەیەکە و بە ڕواندنی درەخت و سەوزایی خزمەتی سروشتی کوردستان دەکات.

خێزانەکەم هەموویان پزیشک و ئەندازیارن، من کچە بچوک بووم نەمدەتوانی بڵیم نابم بە ئەندازیار بەڵام کە بڕوانامەم تێدا وەرگرت پێم وتن ئەوەی ئێوە بەدڵتان بوو کردم بەڵام ئێستا کاتی ئەوەیە کە خۆم دەمەوێت ئەویش وێنە کێشانە.

نور دەڵیت”  لە ساڵی ٢٠١٧ کە لە کۆلێژ دەرچووم هیچ کارێک نەبوو بیکەم، دەستم کرد بە وێنە کێشان،وردە وردە هەوڵمدا هەموو ڕۆژێک وێنەم دەکێشا،دواتر بەشداریخولێکی وێنە کێشانم کرد کە ماوەکەی مانگێک بوو، لەگەڵ ئەوەش بە هەوڵی خۆم و سەیرکردنی یوتوب پاشان دوبارە کردنەوەی شتەکان لەبوارەکەدا  زۆر بەرەوپێشتر چوم.

هەروەها بۆ ماوەی سێ مانگ وەکو مامۆستای هونەر وانەم وتەوە، بەڵام وازم هێنا چونکە دەمەوێت وەک هونەرمەندێک کاری هونەری بکەم.

لە منداڵییەوە ‌دەستی وێنەکێشانم هەبوو زۆر ئارەزوشم دەکرد بەڵام چونکە من کچە بچوکی خێزانەکەمم و وە ئەندامانی خێزانەکەم هەموویان پزیشک و ئەندازیارن نەمتوانی بڵیم ناچمە کۆلێژو ئەندازیاری و ئەو بەشە ناخوێنم، ئەوەم کرد کە ئەوان دەیانەوێت و بەدڵیانە،بەڵام کاتێک تەواوم کرد پێم وتن ئەوەی ئێوە ویستان کردم ئێستە کاتی ئەوەیە کە خۆم دەمەوێت کە وێنە کێشانە.

کاتێک خولی وێنە کێشانەکەم تەواو کرد مانگێک دوای ئەوە دەستم کرد بە فرۆشتنی وێنەکان کە وێنەی پۆرترەیتی کەسەکان خۆیانم دەکێشا بە ڕەساس و لە بەرامبەریدا بڕێک پارەم وەردەگرت.

پاشان وێنەم بە بۆیەی زەیت دروست دەکرد و هەروەها لەسەر دیوارەکان وێنەم دەکێشا، بەڵام لە ئایندەیەکی نزیک کە براندەکەم بەردەست بوو  وێنەکان دەخەمە سەر پۆشاکەکان.

دوو ساڵ لەمەوبەر بیرۆکەی دانانی ئەم براندەم هەبوو، بەڵام ئەوکاتە نەمدەتوانی چونکە پێویستی بەبڕێک پارە هەبوو لەو کاتەدا نەم دەتوانی دابینی بکەم،بەڵام دوای ماوەیەک فۆڕمێکی ڕێکخراوێکی ئەمریکیم پڕکردەوە بە شێوەی ئۆنلاین،ئەم ڕێکخراوە هەڵدەستێت بە پشتگیری کردنی ئەو گەنجانەی بیرۆکەی بازرگانیان هەیە، کە خولی ڕاهێنان دەکەنەوە و تێدا فێری شێوازی بازرگانی و مۆدێل کردنی دەکەن، بەچەند تاقی کردنەوەیەک توانیم بگەمە بەردەم دادوەرەکان وبزنس پلانی خۆم پێشکەش بکەم، هەروەها یەکێک بم لەو کەسانەی کە بڕێک پارە بۆ پرۆژەکەم خەرج بکرێت.

ئێستا لەسەرەتای کارەکەدام و ئامێری تایبەت بەو کارەم کڕیوە و پۆشاکەکانم داوە بەکرد.

ناوی براندەکە لاریکسایە کە کورتکراوەکەی واتا ڕەگی سنەوبەر، وێبسایتێکمان هەیە هاوڵاتیان دەتوانن داوای بکەن، وێنەی سەر جل و بەرگەکانێش زیاتر بەلای سروشت و سەوزاییدا دەڕوات. .

کاتێک بیرۆکەی کارەکەم بۆهات ویستم بەشێوازێک کاربکەم کە بەشێکی ئەو داهاتەی دێتە دەستم تەرخانی بکەم بۆ ڕواندنی دارو سەوزکردنی کوردستان.

ئامانجی من وەک کچێکی هونەرمەند ئەوەیە لەسەرپێێ خۆم بوەستم و بتوانم کاری خۆم هەبێت، لەهەمان کاتدا هانی گەنجانی دەوروبەرم بدەم کە کاربکەن، هەروەها ئەوانەی خاوەنی کاری و پڕۆژەی خۆیانن چاومان لێبکەن کە گرنگی بە پاراستنی ژینگەی دەوروبەری خۆیان بدەن، وەکو پاداشتێک لەبەرامبەر ئەوەی هاوڵاتیان شت لە ئێمە دەکڕن، ئێمەش وەکو پاداشتێک بیگەڕێنینەوە بۆ کۆمەڵگا وخزمەتی ژینگەی خۆمانی پێبکەین.

Leave a comment