ژن و راگــەیــانـدنـی كــوردی

راگەیاندكاری پەیوەندییەكی توندوتۆڵی لەگەڵ رەگەز نییە هێندەی ئەوەی پەیوەندی لەگەڵ لەگەڵ مرۆڤ هەیە وەك بوونەرێكی كاركرد، لەو رووەوە بەشداری مرۆڤی ئازادیخواز لە كایەی میدیای و رۆژنامەوانیدا گرنگییەكی زۆری هەیە، بەتایبەت ژن لەو كۆمەڵگایانەی كە جیاوازی جێندەری تیایاندا رەنگیداوەتەوە.

لە كۆمەڵگاكانی دواكەوتوو ژن هەمیشە پەراوێز دەخرێن، وەكو بوونەوەرێكی ناكامڵ لێیان دەڕواندرێت، پێیانوایە وەكو پێویست لە جێبەجێكردنی ئەركەكانیاندا سەركەوتوو نین و ناكرێت بەتەواوتی پشتیان پێ ببەسترێت.

ئەم روانینە ئەگەر بۆ هەر كایەیەكی تر راست بێت، ئەوا بۆ بواری راگەیاندن بەهیچ شێوەیەك ئامانجەكە ناپێكێت، بەڵكو ژنان لەبواری رۆژنامەوانی و نواندنی چالاكیدا كارەكتەری سەرەكین و ناكرێت رۆڵیان لەبەرچاو نەگیرێت.

كۆمەڵگای دوای راپەڕین كۆمەڵگایەكی كۆنزەرڤاتیڤ بوو، ژن بەئەستەم پێگەی خۆی پێدەدرا، بەڵام لەگەڵ ئەوەشدا كۆڵنەدەر بوو، كچانی گەنج و ژنانی خاوەن ئەزموون قۆڵیان لێ هەڵماڵی، ئیتر وردە وردە ژنی رۆژنامەنووس جێگەی خۆی كردەوە و دووركەوتەوە لەو عەیبەیەی كە ئیدیعای ئەوەی دەكرد راگەیاندن ئیشی ژنان نییە.

لەوكاتەوە تائێستا ژن بەشداری جددی لەكاری رۆژنامەوانی هەیە، راستە گرفت و كەموكوڕی هەن، بەربەست هەست پێدەكرێت، گێچەڵ و شەڕ پێ فرۆشتن دەبینرێت، بەڵام سەرەڕای ئەوانەش ژنان و كچان توانیویانە بەشدارن بن لە ئاژووتنی پرۆسەی میدیای و رۆژنامەوانی كوردی.

میدیا بەشێوەیەكی گشتی پەیامی گەیاندنی زانیاری و دروستكردنی كاریگەریی ئەرێنییە لەسەر دەسەڵاتەكانی تر، بەوەی وەكو دەسەڵاتی چوارەم ناودەبرێت، بۆیە دروستە ئەوەش كە لە سەردەمی ئێستا و سەدەی بیست و یەكدا هەندێكجار و لە هەندێك ناوەندی جیهانی وەكو دەسەڵاتی یەكەم مامەڵەی لەگەڵ بكرێت.

میدیای كاریگەر بۆ پێشخستنی دۆزی ژنان كاریگەری ئەرێنی هەیە ئەگەر خاوەن ستراتیژێكی ژنانەی كاریگەر بێت، لەو رووەوە جیاكردنەوەی میدیای ژنان و پیاوان ئاماژە نییە بۆ پێشكەوتنی میدیا هێندەی ئەوەی بەشداری ژنان بەشێوەیەكی پراكتیكی كاریگەری ئەرێنی هەیە.

 بۆ ئەوەی میدیا بۆ دۆزی ژن كاریگەری باشی هەبێت دوو شت پێویستن:

یەكەم: ژنان و كچان ئازایانە بەشداری بەڕێوەبردنی میدیا جۆراوجۆرەكان بكەن و نەخشیان لە بەرەوپێشبردنی هەبێت.

دووەم: ستراتیژی میدیایی ستراتیژێكی ژن دۆستانە بێت، كێشە نییە پیاوان بەڕێوەی ببەن بەو مەرجەی ئەو پیاوانە بڕوای تەواویان بە ئازادی و یەكسانی ژنان هەبێت.

ئەگەر خواستی راستەقینەی ژنان بەدیهێنانی ئازادی و یەكسانی بێت لەگەڵ پیاو، ئەوا بەشداری و بوونی ژنی راگەیاندنكاری ژنی ئازا و ئازاد پێویستە، ئەوە وا دەكات هەم دامەزراوە میدیایەكە و هەم خاوەنەكانیشی كار بۆ بەدیهاتنی خواستەكانی ژنان بكەن و ئەوەش نەوعیەتی خەباتەكە پێش دەخات.

ئەركی سەرەكی ژنان ئەوەیە قۆڵی لێ هەڵماڵن و بەشداری پرۆسەی پێشخستنی میدیا بەئاراستەی سودگەیاندن بە كێشەكانی ژنان بكەن، ئەوە گرفت و بەربەستی زۆری دێتە رێ، بەڵام ئازایەتی ژنانی ئازادیخواز دەتوانێت ئەو بەربەستانە تێكبشكێنێت و راگەیاندن بخاتە خزمەت پێشكەوتنی بزووتنەوەی یەكسانیخوازی ژنانەوە.

بۆ ئەمەش بەشداری ژنان لەو كایە گرنگەدا پێویستە، پێویستە ململانێی بەشداری زیاتر لە بەڕێوەبردنی دامەزراوە میدیاییەكاندا بخەینە ئەستۆی خۆمان و ئەو كاتەش بەلایەنی كەمەوە هێندەی پیاوان، ئەگەر زیاتریش نەبێت، رۆڵمان لە پێشخستنی ئەو كایە گرنگەدا دەبێت و دەیخەینە پێشخستنی كێشەكانی ژنانەوە.

 



ئه‌م بابه‌ته 2975 جار خوێنراوه‌ته‌وه‌‌

AM:05:24:09/07/2017


زۆرترین خوێندراو