من و ژنانى ئاوارە

لەمانگى 10ى ساڵى 2016 وەکو بەرپرسى سەنتەرى ئاشتى رێکخراوى خەڵک بۆگەشەپێدان PDO لەناحییەى شۆرشى سەر بەقەزاى چەمچەماڵ دەستبەکاربووم ئەوەش دواى ئەوەى رێکخراوى ناوبراو بەئامانجى پشتیوانى کۆمەڵایەتى وپەرەپێدانى زیاتر بەتواناکانى ژنانى ئاوارە وپاراستنیان لەتوندوتیژییەکان بەهاوکارى رێکخراوى UNFPA سەنتەرێکى کۆمەڵایەتى تایبەتى بەژنانى ئاوارە لەناوچەکەدا دامەزراند.
 بێگومان ئەزموونى کارکردن لەبووارى کارى رێکخراوەییدا بۆمن ئەوکات ئەزموونێکى زۆر تازە بوو بەوپێیەى بەندە وەکو رۆژنامەنووسێک لەبووارى کۆمەڵایەتى وژناندا کارم دەکرد وتێکەڵ بوونم بەو بوارە نوێیەش ئەزموونێکى ئاسان نەبوو،بەڵکو ئەوپەرى بەرپرسیاریێەتى بوو، بەڵام لەگەڵ ئەوەشدا گومانى تێدانییە کەهەموو ئەزموونێکى نوێى لەژیاندا بەکۆمەلێک ئەزموونى کە ئاشنامان دەکات .. ئیدى لەو رووانگەیەشەوە بریارمدا سەرەراى هەندێک ئاستەنگى شانى بدەمەبەر و زیاتر بە ئازارو شێوازە ژیانى رۆژانەى ژنانى ئاوارە ئاشنابم وبەکۆمەڵگاشى ئاشنابکەم بەوپێیەى کارکردنم لەناوچەرگەى خەمەکانى ژنانى ئاوارەدا چاوى کردمەوە بەسەر دەریایەک لایەنى شاراوەى ترى ژیان وگوزەرانى رۆژانەى ئەو ژنانە کەئەوەش بۆمن لەیەک کاتدا هەم جێگاى خۆشحاڵى وهەمیش نیگەرانى بوو.
لەناحییەى شۆرشى قەزاى چەمچەماڵ  650 خێزانى ئاوارەى ناوچەکانى ژێر دەسەڵاتى تیرۆرستانى داعش نیشتەجێن کەزۆرینەیان لەپارێزگاکانى ئەنبارو سەلاحەدین وکەرکووک وهەروەها قەزاکانى دەورووبەریان لەفەلوجە وحەویجە و رەمادى و.....هتد هاتوون و روویان لەناوچەکانى کوردستان کردووە وەکو پەناگەیەکى ئارام بۆ ژیانێکى تارادەیەک شایستەتر لەپەناى ژیانى ئاوارەیى ودەربەدەرییدا، بەهەرحاڵ... ئەوەى لێرەدا مەبەستمە تیشکى بخەمەسەر ژیانى ئەو ژنە ئاوارانەى ناوچەکەیە کەتاچەند جیاوازى کەلتوورەکان وشێوازە ژیانى ئێستای دوور لەزیدو خەڵک وکەلتوورى خۆیان رەنگدانەوەى ئەرێنى هەبووە بۆسەر ژیانى رۆژانەى خۆیان وخێزانەکانیان ،یاخوود بەپێچەوانەشەوە بەوپێیەى زۆرێک لەو ژنانە تاوەکو ئێستاش بەهۆى پەیوەست بوون بەداب ونەریت وکەلتوورى کۆمەڵایەتی وناوچەیی خۆیانەوە نەیانتوانێوە پێناسەیەکى شیاو بۆ ژنبوونى خۆیان وهەروەها بۆ رۆڵ وپێگەیان لەنێو خێزان وکۆمەڵگادا بدۆزنەوە .
" ئێمە عەشایەرین وخەڵکێکى رۆشنبیرنین، تکایە ئەگەر جل وبەرگ وخواردن هەبوو ئاگادارمان بکەن وئەگەر نا بۆهیچ خولێکى هۆشیارى بانگێشتمان مەکەن،پیاوەکانمان رێگامان پێنادەن ".. بەمشێوەیە (ت.ح) یەکێک لەکچە ئاوارەکانى پارێزگاى ئەنبار، کەلەئێستادا لەگەڵ خێزانەکەیدا دانیشتووى ناحییەى شۆرشن کۆمەلێک راستى تاڵ وکاریگەرى بەبیرهێنامەوە ئەوەش دواى ئەوەى لەیەکێک لەسیمینارەکانى سەنتەرەکە وەکو بەشداربوویەک ئامادەبوو، قسەکانى ئەو کچە ئاوارەیە بەلاى منەوە شێوازە کاردانەوەیەکى تارادەیەک چاوەروان نەکراو بوو ، هاوکات بەماناى گەراندەوەش بوو بەرەو خاڵى سەرەتا لەوەى کەژن لەم وڵاتە هێشتا رێگایەکى دوور ودرێژى لەپێشدایە بۆ ئەوەى بەرلەپێناسەکردنى لەروانگەى ژنبوونەوە لەرووە مرۆڤایەتییەکەوە لێى بروانرێت وخواست وئاواتەکانى لەبەرچاوبگیرێـت ،هەر خودى ئەو قسانەش بوو جارێکى تر بەو واقیعە حاشاهەڵنەگرەیان شادکردمەوە کەئێمەى ژن لەهەرکوێیەک بین وسەر بەهەر ئینتیماو کۆمەڵگا ونەتەوەو مەزهەبێک بین لەکۆتاییەکەیدا هەر یەک خاڵى هاوبەش کۆمان دەکاتەوە ئەویش ژنبوونمانە لەنێو دونیاى بیرى تەسکى پیاوسالارى فیکرى وکۆمەڵایەتیدا کەهەردەم لەو رووانگەیەوە قوربانى بووین وباجى سەختمان داوە لەپاى سەیرکردنمان وەکو "زەعیفەیەک "..جا تیشک خستنەسەر ئەم بابەتە لەدیوى نەهامەتییەکانەوە بەشێوەیەکى زیاتر بەماناى دیدێکى رەشبینانە نایەت بۆ کۆى بابەتەکە بەگشتى، نەخێر.. بەڵکو زۆر جار ئەوە واقیعە خۆى لەشێوازێکى زۆر سەخت ودژواردا دەنوێنێت و وادەکات تیشک خستنەسەر ئەو بابەتە بەخشێنەرى ئەو وێنایە نەبێت کەئێمەى ژن دەیخوازین وهەوڵى بۆ دەدەین.
یەکێکى تر لەو ئەزموونانەى لەماوەى ئەم چەند مانگە کورتەى کاری رێکخراوەییم دا بەدیم کرد وتەنانەت بەشى خۆشى کاریگەرى هەبوو لەسەر شێوازى رۆژانەى ئیشکردنى ئێمە لەسەنتەرەکە ئەوەبوو کەبەشى هەرە زۆرى ژنانى ئاوارە تاوەکو ئێستاس نەیانتوانیوە بەسەرەتاترین مافەکانى خۆیان ئاشنا بن یاخوود هیچ دەرەفەتێکى کۆمەڵایەتى وکەلتوورى وهەروەها رۆشنبیریشیان بۆنەرەخساوە بۆئەوەى لانى کەم بەشێکى ئەگەرچى بچووکیش بێت لەماف وئازادییە کەسیێەتیێەکانى خۆیان مومارەسە بکەن بەتایبەت مافە کۆمەڵایەتییەکان هەڵبەتە هۆکارى ئەمەش بۆ زاڵبوونى لایەنى کەلتوورى دەگەرێتەوە ،ئەو کەلتوورەى ژن تێیدا کراوەتە پلەدوو و وەکو پاشگۆیەک بۆنێرینەکانى کۆمەڵگا هەژمارى بۆکراوە ،ئیدى لەم دیدە کەلتوورى وکۆمەڵایەتیشەوە هەڵبەتە باسکردن لەمافەکانى ژن لەنێو ئەو خێزانانە وتەنانەت لەنێو ئەو ژنانە خۆشیاندا هێلێکى سوورى ئێجگار سەختەو نزێک بوونەوەش لێى کارێکى ئاسان نییە، چونکە لەنێوان خواست وکەلتوورداپیاوسالارى وشەرەفبازى بریاردەرى یەکەمە ".
" ماوەى 8 مانگە وەکو خێزانێکى ئاوارەی پارێزگاى ئەنبار لەناحییەى شۆرش نیشتەجێى بووین، بەدرێژایى ئەوماوەیەش نەچوومەتە دەرەوەى ماڵەکەم ، ئاخر شەرەف گرانەو قسەى خەڵکیش وەکو تیر دەتبرێت وژیانت لێدەکات بەدۆزەخ !".. ئەمەش یەکێکى ترە لەدەیان ئەونموونانەى رۆژانە لەچوارچێوەى کارەکەمدا مامەڵەیان لەگەڵدا دەکەم، ئەوەى ئەو ژنە تەمەن (46 ساڵە) باسی لێوەکرد بەراستى جێگاى نائۆمیدى بوو ،بەڵام خۆ واقیعێکى ترى بەرجەستەکراویشەو ئەگەر لەدێوەکانى تریشەوە خوێندنەوەى بۆبکرێت رەنگە دەیان ئازار ونەهامەتى وچێرۆکى زیندووى شاراوەى ترى لەپشتەوە ببێـت ..بۆیە هەمیشە لەوبروایەدام کارکرن لەبووارى ژنان بەگشتى وژنانى ئاوارە بەشێوەیەکى تایبەت کارێکى ئاسان نییە بۆ سەرجەمى ئەو لایەنانەى کەکار لەم بووارەدا دەکەن لەرێکخراوەکان وچالاکوانان و...هتد ،چونکە کارکردن لەم بووارەدا پێویستى بەهێزو ئیرادەو خۆراگرى هەیە بەرامبەر بەو چیرۆکانەى رۆژانە لەسەر زارى ئەو ژنانەوە دەیانبیستن و هەستیان پێ دەکەین وەکو کۆمەڵەچیرۆکێکى واقیعییانەى تاڵ کەژن تێدا پشکى شێرى بەرکەوتووە لەئازارو نەهامەتییەکان.
 
 ئەڤین 
لەيلا
لە/ ژن مەگەزن


ئه‌م بابه‌ته 3232 جار خوێنراوه‌ته‌وه‌‌

AM:11:37:09/02/2017


زۆرترین خوێندراو