یاسا لەکوێى تاوانەکانى كوشتنى ژنان دایە؟!

" باوکێک دەبەیەک نەوت دەکات بەکچەکەیدا ودەیسووتینێت.. ژنێکیش بەهۆى توندوتیژییەوە نێوەى پەراسووەکانى دەشکێنرێن وبەبێهۆشى لەنەخۆشخانە دەمێنێتەوە " بەڵى، ئەمانە تازەترین رووداوەکانى توندوتیژیین بەرامبەر بەژنان وکچان لەکۆمەڵگاى کوردی ولەکۆتا رۆژەکانى ساڵى 2016 دا کەوەکو دووتاوانى کۆمەڵایەتى مەترسیدار جارێکى تر رایانچەڵەکاندین بەسەر کۆمەلێک راستى پشتگوێ خراو لەواقیعى ژیانى رۆژانەى ژنان وکچان لەکۆمەڵگادا.. جا لێرەدا ناگەرێمەوە سەر باسى ئەوەى هۆکار چی بوو وکێ تاوانبار بوو یاخوود بۆچى نەتوانرا رێگرى لەم جۆرە رووداوانە بکرێت .. چونکە تاوانبارەکانى ئەم دوو رووداوەش وەکو تاوانبارى کەیسى کوشتنى دونیا ودەیان کەیسى ترى هاوشێوەى ئاشکرایە کێن وناشکرێت هەموو جارێک هەمان قەوانى لێبەینەوە.
لەهەرێمێکدا ئەگەر یاسا سەروەر نەبوو وئەقڵیییەتى خێڵ وعەشێرەت لەسەرووى دەسەڵاتى دادگا ویاساوە بوو بێگومان تاوانە کۆمەڵایەتیێەکانى لەم چەشنە کۆمەڵە تاوانێکى زۆر ئاسایى دەبن، بەرزبوونەوەى ئامارەکانى ئەم جۆرە توندوتێژییانە وهەمەجۆر بوونیشیان لەرووى قێزەوەنى تاوانەکانەوە کۆمەلێک فاکتەرى کۆمەڵایەتى وکەلتوورییان لەپشتەوەیە کەوایکردووە لەسایەى ئەم بۆشاییە یاساییەى لەئێستادا هەیەو خۆى لەنەبوونى یاسایەکى فیعلى وکاریگەر دەبینێتەوە لەچۆنییەتى بەرەنگاربوونەوەى توندوتێژییە خێزانییەکان ئەم جۆرە مەترسییانە بۆسەر ئاشتەوایى خێزانى وکۆمەڵایەتى بخاتە حاڵەتى  گەشەکردنێکى بەردەوامەوە  وهاوکات دەرفەتی زۆر زیاتریش بۆ نێرینە پیاوسالارەکانى کۆمەڵگا برەخسێت بەوەى کە تاوانى زیاتر وزیاتر ئەنجام بدەن لەژێرناوى شەرفپارێزی دا بەبێ ئەوەى هیچ سانسۆر ورێگرییەکى یاسایی هەبێت بەسزاى شیاویان بگەینێت ..بەڵى، کێشەى ژن لەکۆمەڵگادا کێشەى نەبوونى یاسایەکى فیعلییە کەژیان وکەرامەتیان لەسایەی دا پارێزراوبێت پێش هەر لایەنێکى کە ئەمەش جارێکى تر رۆلى دەزگا یاسایی وتەشریعییەکان بەگشتى دەخاتە ژێر پرسیارەوە ئاخۆ تاوەکو کەى دەبێت ژن قوربانى دەستى تاوان ویاساى شەرفپارێزى بێت وبەیاساى خێل بریار لەژیان وبوونى بدرێت ؟.. زیادبوونى رێژەى ئەم جۆرە تاوانە ئاماژەیەکى روونن بەوەى کەیاسا لەم هەرێمەدا بێ دەسەڵات ولاوازە .. ئاماژەیەکى راستەوخۆیە بەوەى کەحکومەت ودەزگا تەشریعییەکان لەئاستى ئەم تاوانانە کەمتەرخەم وبێباکن دەنا چۆن دەبێت یاساى تاک لەسەرووى چەکوشى دادگاو یاساى گشتییەوە بێت ؟!... بۆیە تاوەکو یاسا رۆلێ راستەقینەى خۆى نەگێرێت دەکرێت زۆر بەراشکاوانە بلێین خودى یاسا خۆشى شەریکە تاوانەو دەبێت سزا بدرێت.


ئەڤین لەيلا
 

 


ئه‌م بابه‌ته 942 جار خوێنراوه‌ته‌وه‌‌

PM:12:38:24/12/2016


زۆرترین خوێندراو