تارا خالید: هونەرەکەم بۆ بەرزکردنەوەى پێگەى ژنە لەکۆمەڵگادا

زۆرن ئەوانەى پێیان وایە هونەرى پەیکەرسازى کارێکى ئەستەمە بۆ ژنان کەبتوانن لەرێگایەوە گوزارشت لەواقیع وخواستەکانى خۆیان بکەن ،بەڵام تارا خالید خانمە هونەرمەندى پەیکەرساز له شارى سليمانى، لەدیمانەیەکى مالپەرى "چاوى خەلک" دا بۆچوونێکى جیاوازترى هەیەو تەنها وەلامێشى بۆهەموو ئەوکەسانە کارو بەرهەمە هونەرییەکانێیەتى لەدونیاى کارى پەیکەرسازیدا.

* لەئێستادا هونەرى شێوەکارى لەچ ئاستێکدایە؟
ـ بەشێوەیەکى گشتى هونەرى شێوەکارى لەئاستێکى باش دایەو هەوڵى زیاتریش دەدرێت بۆ بەرەوپێشچونى بەتایبەت لەلایەن هونەرمەندان خۆیانەوە ،بەڵام بەداخەوە هونەر بەشێوە گشتییەکەى لەوڵاتى ئێمە گرنگیەکى ئەوتۆى پێنادرێت.

* شەڕى نەگریسى داعش وبارودۆخى دارایى تاوەکو چەندکاریگەرى هەبووە لەسەر بەرەوپێشچوونى هونەرى پەیکەرسازى لەکوردستاندا ؟
ـــ ئەم بارودۆخەى ئێستا چ لەرووى مادییەوە بێت یاخوود لەرووى مەعنەویشەوە کاریگەرییەکى زۆرى لەسەر هەموو جومگەکانى ژیانى هونەرمەندان وخودى هونەرەکە خۆشى بەجیهێشتووە..ئێستا زۆرێک لەپرۆژە هونەرییەکان وەستاون ئەوەش بەراستى مایەى نیگەرانییە.

*وەک خانمە هونەرمەندێکى پەیکەرساز تاچەند پێت وایە هونەرى پەیکەرسازى کارێکى ئاسانە بۆ ژنان؟
ــ هونەرى پەیکەرسازى هونەرێکى قورس وگرانە، هەتاوەکو کارێکى هونەرى بەرهەم دەهێنیت پێویستیت بەکۆمەلێک کەرەستەى تایبەتە بەکارەکە وەک قاڵب و داڕشتنى قاڵبەکەو وشکردنەوەى بۆیاخکردن وهەروەها چەندین رێگەو پێویستى تر ئەمانەش کاتێکى زۆرى دەوێت بۆیە لەم بوارەدا پەیکەرسازى ژنمان کەمە کەبتوانن پەرە بەهونەرەکە بدەن ودرێژە بەکارەى پەیکەرسازى بدەن.. لەلایەکى تریشەوە ئەبێت ئەوەشمان لەیادبێت ژن دایکە وبەرپرسە لەپەروەردەکردنى منداڵ ئەمەش دیسان کارێکى گرانە بۆهەندێک لەژنانى پەیکەرساز کەبتوانن هاوسەنگى راگرن لەنێوان ئەو لایەنانەى ئاماژەم پێدا ،بەڵام من وەکو خۆم توانیومە جۆرێک لەهاوسەنگى دروست بکەم لەنێوان خێزان و کارە هونەرییەکانمدا وبەبێ هیچ گرفت ورێگرییەکیش بەردەوام بم لەبوارەکەدا.

* پێت وایە لەرێگاى هونەرەکەتەوە توانیوتە گوزارشت لەئازارەکانى ژنان بکەیت ؟
ــ کارکردنم لەم بوارەى هونەردا بۆ برەوپێشچونى هونەرەکەم وهەروەها بەرزکردنەوەى پێگەى ژنە لەنێو کۆمەڵگادا،من نامەوێت بلێم ئازارەکان یاخوود هەر وشەیەکى تر کەببێتە هۆکارى  ئازاردانى  ژن.. ئێمە دەبێت هەوڵبدەین بۆ لەناوبردنى هەموو ئازارو توندوتیژییەک بۆئەو مەبەست پێویست ناکات چاوەرێى هیچ کەس ولایەنێک بکەین ،بەڵى ژن دەبێت هەوڵ بدات ولەهەربوارێکدا بێت پێگەى خۆى بسەلمێنێت.

* زۆرجار دەوترێت هونەرى پەیکەرسازى هونەرێکى قورخکراوە لەلایەن پیاوانەوە وژنانیش لەم بەشەى هونەردا بوارى شیاویان بۆنەرەخساوە بۆچوونە پێشەوەو خۆسەلماندن..لەمبارەیە چى دەلێت؟
ــ بێگومان گوێمان لەو قسانەش بووە  یاخوود هەندێک جار پیاوان خۆیان بڕوایان بەتواناکانى ژنان نەبووە لەبوارى کارى پەیکەرسازیدا،بەڵام ئێمە هەموو کات ئەو بۆچوونانەمان  رەتکردۆتەوە ئەوەش تەنها لەرێگاى کارو تواناکانمانەوە لەبوارەکەدا .

*پرۆفایل:
ـ تارا خالید  1975ـ سلێمانى
ـ دەرچووى پەیمانگاى هونەرەجوانەکانى سلێمانى ـ بەشى پەیکەرسازى
ـ سەرەتاى تیکەلبوونى بەدونیاى کارى هونەرى دەگەرێتەوە بۆساڵى 1994
ـ بەشدارى چەندین فیستیڤاڵ وپێشانگەى کردووە لەدەرەوەو هەروەها لەناوخۆى کوردستانیش لەوانە (فیستیڤاڵى شێوەکارى لاوان، پێشانگەى ئێمەى منداڵان وهەروەها لەگروپى گوڵەبەرۆژەکان لەوڵاتى کەنەدا بەشدارى زۆربەى بۆنەکانى 8مارسى کردووە وخاوەنى چەندین کارى پەیکەرسازییە لەوانەش پەیکەرى ژینگە لەپارکى ئازادى شارى سلێمانى).

چاوى خەڵک/ تریفە حەسەن
 
 
 


AM:02:46:25/06/2016




ئه‌م بابه‌ته 565 جار خوێنراوه‌ته‌وه‌‌