د.نگین جه‌عفه‌ر: قۆناغى منداڵى، گونجاوترین قۆناغه‌ بۆ ئاشناكردنى منداڵ به‌بنه‌ماكانى په‌روه‌رده‌ى سێكسى

له‌نێوان رێگاپێدراو پێچه‌وانه‌كه‌یدا، تاوه‌كو ئێستا دۆسییه‌ى په‌روه‌رده‌و رۆشنبیرى سێكسى لاى منداڵان به‌یه‌كێك له‌هه‌ستیارترین دۆسییه‌ كۆمه‌ڵایه‌تییه‌كان هه‌ژمار ده‌كرێت كه‌كۆمه‌ڵگاى كوردى به‌هه‌ڵواسراوى له‌لێوارى دوو جه‌مسه‌رى جیاوازى دژه‌ یه‌كتردا هێشتووته‌وه‌، له‌به‌رامبه‌ریشدا نه‌خێزان، نه‌ش لایه‌نه‌ په‌یوه‌ندیداره‌كان نه‌یانتوانیوه‌ به‌پێ پێویست كار له‌سه‌ر ناساندنى زانستیانه‌ى بابه‌ته‌كه‌ بكه‌ن به‌ئاڕاسته‌ى به‌رهه‌مهێنانى كۆمه‌ڵگایه‌كى كراوه‌ به‌ڕووى حه‌زو پێداویستییه‌ سێكسى وجه‌سته‌ییه‌كانى منداڵان دا.

د.نگین جه‌عفه‌ر، پسپۆرى نه‌خۆشییه‌كانى ژنان ومناڵبوون له‌وڵاتى دانیمارك، له‌دیمانه‌یه‌كى تایبه‌تى ماڵپه‌رى "چاوى خه‌ڵك" بۆ پرسه‌كانى ژنان، ده‌لێت" قۆناغى 8 ـ 9 ساڵى، قۆناغێكى شیاوه‌ بۆ ئه‌وه‌ى منداڵان به‌بنه‌ماكانى په‌روه‌رده‌ى سێكسى و جه‌سته‌يى ئاشنا بكرێن"، ئاماژه‌ به‌وه‌شده‌كات" ئه‌ركى لایه‌نه‌ په‌یوه‌ندیداره‌كانه‌ له‌رێگاى كه‌مپینى جۆراوجۆره‌وه‌ هۆشیارى ته‌واو بده‌ن، كۆمه‌ڵگا له‌مه‌ترسییه‌كانى نه‌بوونى په‌روه‌رده‌یه‌كى سێكسى ته‌ندروست بپارێزن".


*گرنگى قسه‌كردن له‌سه‌ر بابه‌تێكى له‌مشێوه‌یه‌ له‌كوێدایه‌، له‌كاتێكدا له‌ڕووى كۆمه‌ڵایه‌تیه‌وه‌ به‌تایبه‌ت هێشتا قسه‌كردن له‌سه‌ر بابه‌ته‌ سێكسییه‌كان به‌گشتى، بۆسه‌رجه‌م قۆناغه‌كانیش بابه‌تێكى هه‌ستیاره‌و وابه‌سته‌ كراوه‌ به‌لایه‌نه‌كانى ئادابى گشتى، نه‌ریت وڕه‌وشتى تاكه‌ كه‌سییه‌وه‌، به‌دیاریكراویش له‌نێو كۆمه‌ڵگاى كوردی دا ؟.

ـ سه‌ره‌تا ئه‌مه‌وێت ئاماژه‌ به‌وه‌ بده‌م بابه‌تى هۆشیارى، رۆشنبیرى سێكسى لاى تاكى كورد به‌داخه‌وه‌ زۆر لاوازه‌.. به‌نده‌ وه‌كو پزیشكێكى پسپۆر زۆر جار له‌رێگاى ئه‌و نامانەی ئاڕاسته‌م ده‌كرێن گۆمانم لادروست ده‌بێت ئاخۆ چۆن ده‌بێت مرۆڤێكى ساڵى 2019 هێنده‌ كه‌م زانیارى بێت له‌باره‌ى بابه‌تێكى ته‌واو تایبه‌ت به‌جه‌سته‌و ژیانى خۆیه‌وه‌، به‌ڵام دواتر ده‌گه‌مه‌ ئه‌و بڕوایه‌ى كه‌ئه‌وه‌ واقعێكى تاڵه‌ له‌ژیانى تاكى كورد، به‌رده‌وام بوونى هه‌یه‌، ئه‌وه‌ش به‌هۆى ئه‌وه‌ى كه‌قسه‌كردن له‌سه‌ر ئه‌و بابه‌ته‌ هاوشێوه‌ى عه‌یبه‌، بێحورمه‌تى وهه‌روه‌ها به‌دڕه‌وشتى خوێندنه‌وه‌ى بۆ كراوه‌ له‌لایه‌ن كۆمه‌ڵگاوه‌.. به‌ڕاستى ئه‌م جۆره‌ شیكردنه‌وانه‌ له‌بنه‌ڕه‌تدا هه‌ڵه‌یه‌كى گه‌وره‌ن.. تاك هه‌ر له‌ته‌مه‌نى منداڵییه‌وه‌، به‌تایبه‌تیش ئه‌و ده‌مه‌ى ده‌چێته‌ قۆناغى هەرزەکاری ئیدى ده‌بێت ئاشنا كرابێت به‌وه‌ى چۆن مامه‌ڵه‌ له‌گه‌ڵ گۆرانكارییه‌ هۆرمۆنییه‌كان وهه‌روه‌ها حه‌زه‌ سێكسییه‌كانى خۆیدا بكات.. بابه‌تى حه‌زو ئاره‌زووى سێكسى بابه‌تێكى ته‌واو سروشتییه‌ و هاوشێوه‌ى پێویستییه‌كانى جه‌سته‌یه‌ بۆ خۆراك، به‌ڵام  ئێمه‌ به‌شێوازێك كارمان له‌سه‌ر كردووه‌ وه‌كو ئه‌وه‌ى گوناهێكى گه‌وره‌ بێت.. بۆیه‌ تاوه‌كو ئه‌و بیركردنه‌وانه‌ نه‌شكێنرێن، دایكان وباوكان وهه‌روه‌ها لایه‌نه‌ په‌یوه‌ندیداره‌كانیش له‌وه‌زاره‌تى رۆشنبیرى، په‌روه‌رده‌ وته‌ندروستیش له‌رێگاى پرۆژه‌و به‌رنامه‌ى هاوبه‌شه‌وه‌ كار له‌سه‌ر هۆشیاركردنى تاك نه‌كه‌ن ده‌شێت قسه‌كردن له‌سه‌ر ناوه‌رۆكى بابه‌ته‌كه‌ هه‌ر به‌و شێوه‌یه‌ بێت كه‌وه‌كو بابه‌تێكى نامۆ و مه‌ترسیدار سه‌یر بكرێت...  له‌وڵاتى دانیمارك ساڵانه‌ یه‌ك هه‌فته‌ ته‌رخان ده‌كرێت بۆ هۆشیاركردنه‌وه‌ى سێكسى له‌ژێرناوى( هه‌فته‌ى شه‌شه‌م)، له‌و هه‌فته‌یه‌شدا منداڵان هۆشیار ده‌كرێنه‌وه‌ به‌بابه‌ته‌ سێكسییه‌كانى وه‌كو چۆنییه‌تى خۆپاراستن له‌دووگیانى بوون، زانیارى ده‌رباره‌ى نه‌خۆشییه‌ سێكسییه‌كان، بابه‌تى نه‌زۆكى وهه‌روه‌ها كۆمه‌لێك لایه‌نى تریش، كه‌ئه‌وه‌ش ده‌رگا واڵا ده‌كات بۆ یارمه‌تیدانى دایكان وباوكان له‌باره‌ى به‌خشینى هۆشیارى زیاتر به‌منداڵه‌كانیان.. جا لێره‌وه‌ ئه‌ركى وه‌زاره‌تى په‌روه‌رده‌یه‌ وه‌كو یه‌كێك له‌لایه‌نه‌ په‌یوه‌ندیداره‌كان هه‌ستێت به‌دانانى پرۆگرامێكى چڕ له‌ناو سیسته‌مى خوێندن و په‌روه‌رده‌دا تایبه‌ت به‌بابه‌تى په‌روه‌رده‌و رۆشنبیرى سێكسى، به‌تایبه‌تیش له‌ئێستادا كه‌كابینه‌ى نۆیه‌مى حكومه‌ت پێكهێنراوه‌ وپێویسته‌ له‌به‌رنامه‌ى چوارساڵى داهاتووشدا ئه‌م بابه‌ته‌ گرنگى زیاترى پێ بدرێت.. له‌ڕاستیدا په‌رده‌پۆشكردنى بابه‌ته‌ سێكسییه‌كان و شاردنه‌وه‌یان له‌ژێر ناونیشانى جۆراوجۆردا هۆكارێكه‌ بۆئه‌وه‌ى چیتر هه‌ندێك له‌و ڕووداوانه‌ى رۆژانه‌ به‌رۆك به‌كچان و ژنانى كۆمه‌ڵگا ده‌گرن له‌توانج وگێچه‌ڵپێكردنى سێكسى و....هتد وه‌كو كۆمه‌ڵه‌ ڕووداوێكى ئاسایى ببینرێن، ئه‌مه‌ش له‌كاتێكدا له‌وڵاتێكى وه‌كو دانیمارك ئه‌و جۆره‌ ڕووداوانه‌ هاوشێوه‌ى ده‌ستدرێژى سێكسى سه‌یرده‌كرێن وبه‌توندترین شێواز رێوشوێنى یاساییان له‌به‌رامبه‌ردا ده‌گیرێته‌به‌ر.

* هیچ قۆناغێكى ته‌مه‌نى دیاریكراو هه‌یه‌ كه‌بتوانرێت وه‌كو سه‌ره‌تایه‌ك بۆ ئاشناكردنى منداڵ به‌بابه‌ته‌كانى په‌روه‌رده‌و رۆشنبیرى سێكسى هه‌ژمار بكرێت، بكرێته‌ بنه‌مایه‌ك بۆ دروستبوونى تێگه‌یشتنى ته‌ندروست له‌باره‌ى سێكس و جه‌سته‌وه‌ ؟.

ـ قۆناغى 8 ـ 9 ساڵى قۆناغێكى شیاوه‌ بۆ ئه‌وه‌ى منداڵ چ كوڕ بێت یاخوود كچ ئاشنا بكرێت به‌بابه‌ته‌كانى سێكس و جه‌سته‌.. بۆ نموونه‌ هه‌ندێك له‌كچان له‌ته‌مه‌نى 10 ـ 11 ساڵى ده‌چنه‌ قۆناغى سووڕى مانگانه‌وه‌.. لێره‌دا ده‌بێت ئاشنا بكرێن به‌وه‌ى ئه‌گه‌ر ڕوبه‌رووى ده‌ستدرێژى سێكسى بوونه‌وه‌ ئه‌وا ئه‌گه‌ری زۆره‌ دووگیان بن.. هه‌ڵبه‌ته‌ نه‌گه‌یاندنى ئه‌و زانیارییانه‌ به‌منداڵ له‌و قۆناغه‌ى ئاماژه‌م پێكرد واتا دایكان وباوكان نه‌یانتوانیوه‌ به‌شێوازێكى دروست مامه‌ڵه‌ بكه‌ن و پێكه‌وه‌ كار له‌سه‌ر دروستبوونى ئه‌و تێگه‌یشتنانه‌ بكه‌ن لاى منداڵه‌كان، بۆیه‌ زۆر گرنگه‌ قسه‌كردن له‌سه‌ر حه‌زو ئاره‌زووه‌ سێكسیه‌كانى مرۆڤ له‌پێش چوونه‌ نێو قۆناغى باڵغ بوونه‌وه‌ بێت، ئه‌م شیكردنه‌وه‌یه‌ش بۆ كوڕان وكچان به‌هه‌مان شێوه‌یه‌، هاوكات كارێكى ته‌واو سروشتیشه‌، چونكه‌ متمانه‌یه‌ك ده‌به‌خشێت به‌منداڵه‌كه‌ به‌وه‌ى ئه‌گه‌ر تووشى ڕووداوێك بوو بتوانێت په‌نا بۆ دایك وباوكى ببات.

* وه‌كو پزیشكێكى پسپۆر له‌بوارى ژنان و منداڵبوون، ئه‌زموونى خۆت له‌گه‌ڵ ئه‌و كه‌سانه‌ى رۆژانه‌ په‌یوه‌ندی ده‌كه‌ن وداواى رێنماییت لێده‌كه‌ن له‌باره‌ى بابه‌ته‌ سێكسییه‌كانه‌وه‌ به‌گشتى چۆن ده‌بینیت، وچین ئه‌و كێشه‌و گرفتانه‌ى ڕووبه‌روویان ده‌بێته‌وه‌؟

ـ من له‌ئێستادا خاوه‌نى په‌یجێكى پزیشكى تایبه‌تم له‌تۆرى كۆمه‌ڵایه‌تى فه‌یسبووك به‌ناونیشانى Dr. Negin Jaafar ، رۆژانه‌ خه‌ڵك له‌ناوخۆى كوردستانه‌وه‌ په‌یوه‌ندی ده‌كه‌ن وداواى رێنماییم لێده‌كه‌ن له‌باره‌ى بابه‌ته‌ سێكسییه‌كانه‌وه‌ به‌گشتى.. یه‌ك له‌و كه‌یسانه‌ى دێنه‌ به‌رده‌ستم كه‌یسى ده‌ستدرێژىكردنه‌ سه‌ر منداڵانه‌، کەزۆر له‌كوردستاندا ڕووده‌دات، به‌ڵام باس ناكرێت وبه‌شاراوه‌یى ده‌مێنێته‌وه‌.. به‌شێكى تر له‌وانه‌ى په‌یوه‌ندیم پێوه‌ ده‌كه‌ن بریتین له‌و كچانه‌ى له‌ته‌مه‌نى منداڵیدا ڕوبه‌ڕووى ده‌ستدرێژی سێكسى بونه‌ته‌وه‌ دوور له‌حه‌زو ئاره‌زووى خۆیان، له‌ژێر ناوێكى نهێنى دا ته‌واوى وورده‌كارییه‌كانى چۆنییه‌تى ده‌ستدرێژى كردنه‌ سه‌ریان ده‌گێرنه‌وه‌.. بۆیه‌ ئاشناكردنى منداڵ به‌بابه‌ته‌كانى سێكس وجه‌سته‌ كارێكى زۆر پێویسته‌ بۆ خۆپاراستن له‌قۆناغه‌كانى دواترى ته‌مه‌ندا، ته‌نانه‌ت وه‌كو پزیشكێكى پسپۆریش هه‌وڵم داوه‌ منداڵه‌كه‌م به‌و رێنماییانه‌ى ئاشنا بكه‌م و به‌ركه‌وتنیشم نه‌بێت له‌گه‌ڵ ئه‌ندامه‌ هه‌ستیاره‌كانى جه‌سته‌یدا بۆ ئه‌وه‌ى بزانێت كه‌جه‌سته‌ى موڵكى خۆیه‌تى وده‌بێت پارێزگارى لێبكات، یاخوود ئه‌و ده‌مه‌ى ڕوبه‌ڕووى حاله‌تێكى گێچه‌ل بوویه‌وه‌ بتوانێت هاوار بكات و به‌رگرى له‌جه‌سته‌ى خۆى بكات.

* یه‌كێك له‌و دیاردانه‌ى زۆر جار ده‌بێته‌ مایه‌ى ترس و نیگه‌رانى بۆ دایكان و باوكان ئه‌وه‌یه‌ كه‌منداڵه‌كانیان له‌رێگاى كۆمه‌ڵێك ئاماژه‌ى پێشوه‌خت، پرسیار و ته‌نانه‌ت هه‌ندێك جاریش له‌رێگاى گەڕان  به‌نێو ماڵپه‌رو تۆره‌ كۆمه‌ڵایه‌تییه‌كانه‌وه‌ ده‌یانه‌وێت وورده‌كارى زیاتر له‌باره‌ى سێكس وجه‌سته‌وه‌ بزانن..  چ ئامۆژگارییه‌كت هه‌یه‌ له‌و ڕووه‌وه‌ ؟

ـ بێگومان هه‌موو ئه‌و حاڵه‌تانه‌ بوونیان هه‌یه‌، به‌ڵام ئه‌و جۆره‌ كاردانه‌وانه‌ى دایكان و باوكان واده‌كات منداڵه‌كان له‌ڕووى ده‌روونییه‌وه‌ بابه‌ته‌كه‌ له‌ناخى خۆیان كپ بكه‌ن، به‌شاراوه‌یى بێهێڵنه‌وه‌و ده‌ره‌نجامه‌كانیشى به‌دڵنییاییه‌وه‌ له‌قۆناغه‌كانى دواتر، له‌كاتى چوونه‌ نێو پرۆسه‌ى هاوسه‌رگیرییه‌وه‌ ده‌رده‌كه‌وێت كه‌تووشى كێشه‌و گرفتى زۆریان ده‌كاته‌وه‌.. ده‌بێت ئێمه‌ ئه‌و واقیعه‌ قبوڵ بكه‌ین سه‌رده‌مى ئێستا، سه‌رده‌مى گۆرانكاريه خێراكانه‌و كۆمه‌لێك بوارى زۆریش له‌به‌رده‌ستدایه‌ بۆ ئه‌وه‌ى منداڵه‌كانمان بتوانن له‌و رێگایانه‌وه‌ بگه‌ن به‌حه‌زه‌ سێكسییه‌كانى خۆیان... بمانه‌وێت یاخود نا دنیاى ته‌كنه‌لۆژیا، یوتیوب، گۆگڵ وهه‌روه‌ها سه‌دان ماڵپه‌رو تۆرى كۆمه‌ڵایه‌تى هه‌ن كه‌ده‌توانرێت له‌رێگایانه‌وه‌ هه‌موو ئاره‌زووه‌كان به‌شێوه‌یه‌كى ئاسان فه‌راهام بكرێن، خودى ئه‌م بابه‌ته‌ش په‌یوه‌ندى به‌وه‌وه‌ نییه‌ ئاخۆ كه‌سه‌كه‌ له‌خێزانێكى كراوه‌دا په‌روه‌رده‌ كراوه‌ یاخوود داخراو، به‌ڵكو ئێستا ساڵى 2019 یه‌، بابه‌ته‌ سێكسییه‌كانیش وه‌كو زۆرێك له‌بواره‌كانى تر ئاوێته‌ى ژیانى یه‌ك به‌یه‌كى تاكه‌كان بوون.. و له‌به‌رامبه‌ریشدا هیچ جۆره‌ په‌روه‌رده‌یه‌كى دروست بوونى نییه‌ چ له‌لایه‌ن خێزانه‌كانه‌وه‌ وهه‌روه‌ها له‌ناوه‌نده‌كانى خوێندن وته‌نانه‌ت له‌رێگاى میدیاكانیشه‌وه‌ بۆ ئه‌وه‌ى تێگه‌شتنێكى دروست بدات به‌تاك ده‌رباره‌ى بابه‌ته‌كانى جه‌سته‌و سێكس، هه‌موو ئه‌وانه‌ش ده‌بنه‌ هۆكارى دروستبوونى ده‌یان كێشه‌ى ده‌روونى بۆ تاكه‌كان وهاوكات كێشه‌ى خێزانى وكۆمه‌ڵایه‌تى زۆر گه‌وره‌ش... ئێمه‌ وه‌كو چۆن بێ سانسۆر بوارى ته‌كنه‌لۆژیامان خستۆته‌ به‌رده‌ستى كۆمه‌ڵگا ده‌بێت به‌هه‌مان شێوه‌ش كۆمه‌لێك وه‌سیله‌ بۆ گه‌نجه‌كانمان فه‌راهام بكه‌ین بۆ ئه‌وه‌ى بزانن چۆن مامه‌ڵه‌ له‌گه‌ڵ ئه‌و بواره‌دا بكه‌ن.

* ئاماژه‌ت به‌باڵاده‌ستى ته‌كنه‌لۆژیا، گۆرانكارییه‌ خێراكانى ژیانى سه‌رده‌مدا.. ده‌مه‌وێت بپرسم، ئێمه‌ چۆن بتوانین پێداویستییه‌ جه‌سته‌ییه‌كانى خۆمان له‌نێو ئه‌و هه‌موو گۆرانكارییانه‌دا به‌دروستى بهێڵینه‌وه‌.. ئه‌م ئه‌ركه‌ له‌ئه‌ستۆى كێ دایه‌ ؟.

ـ خێزان، وه‌زاره‌تى په‌روه‌رده‌ رۆڵێكى گه‌وره‌ ده‌گێرن له‌م ڕووه‌وه‌.. زۆر جار كه‌ ده‌گه‌رێمه‌وه‌ كوردستان پرسیار له‌كه‌سانى ده‌وروبه‌رى خۆم ده‌كه‌م ئاخۆ هیچ جۆره‌ زانیارییه‌كیان پێده‌گات له‌ناوه‌نده‌كانى خوێندن وته‌نانه‌ت له‌زانكۆكانیشه‌وه‌ تایبه‌ت به‌لایه‌نه‌كانى په‌روه‌رده‌ى سێكسى، كۆئه‌ندامى زاوزیێ، نه‌خۆشییه‌ جنسییه‌كان و هه‌روه‌ها حه‌زه‌ سێكسى ومه‌ترسییه‌كانى دووگیانى بوون له‌ناوه‌نده‌كانى خوێندندا، به‌ڵام به‌داخه‌وه‌ زۆرینه‌یان ئاماژه‌ به‌وه‌ ده‌كه‌ن به‌شى زۆرى مامۆستاكان ئه‌و بابه‌تانه‌ تێده‌په‌رێنن، داوا له‌خوێندكاران ده‌كه‌ن خۆیان پێداچوونه‌وه‌ى بۆ بكه‌ن.. له‌كاتێكدا به‌نده‌ كه‌ له‌پۆلى حه‌وت بووم مامۆستاكه‌م ئه‌و زانیارییانه‌ى پێ ده‌گه‌یاندین له‌رێگاى هه‌فته‌ى شه‌شه‌مه‌وه‌ وه‌كو هه‌فته‌ى زانیارى سێكسى له‌ناوه‌نده‌كانى خوێندن له‌وڵاتى دانیمارك، كچان وكورانیش له‌یه‌ك پۆلدا به‌تێكه‌ڵاوى ڕاده‌هێنران له‌سه‌ر چۆنییه‌تى مامه‌ڵه‌كردن و خۆپاراستن له‌تووشبوون به‌نه‌خۆشییه‌كانى زاوزیێ و هه‌روه‌ها مه‌ترسییه‌كانى دووگیانى بوون له‌قۆناغه‌كانى دواترى ته‌مه‌ندا.

* هه‌ر له‌بوارى ته‌كنه‌لۆژیا ده‌مێنمه‌وه‌، ده‌مه‌وێت جیاواز له‌قۆناغى منداڵى وهه‌رزه‌كاری ئاماژه‌ به‌كاریگه‌رییه‌كانى ئه‌و جیهانه‌ش بده‌یت بۆ سه‌ر سروشتى په‌یوه‌ندى سێكسى نێوان ژن ومێردى كورد به‌تایبه‌تى.. له‌كاتێكدا بابه‌ته‌كانى هۆشیارى ورۆشنبیرى سێكسى ده‌شێت به‌كۆمه‌ڵه‌ بابه‌تێكى گشتگیر سه‌یربكرێن بۆ هه‌موو قۆناغه‌كانى ته‌مه‌ن؟

ـ بێگومان به‌ده‌ر له‌قۆناغى منداڵى، هه‌رزه‌كارى گرنگه‌ ئێمه‌ باس له‌سروشتى پیكه‌وه‌بوونى ژن ومێردیش بكه‌ین له‌نێو كۆمه‌ڵگاى كوردیدا به‌تایبه‌ت.. نزیكه‌ى 70% ئه‌و ژنانه‌ى سه‌ردانم ده‌كه‌ن ئاماژه‌ به‌وه‌ ده‌ده‌ن كه‌هاوسه‌ره‌كانیان له‌ساته‌وه‌ختى جوتبوون داوایان لێده‌كه‌ن هاوشێوه‌ى فیلمه‌ پۆرنه‌كان پرۆسه‌ى سێكسیان له‌گه‌ڵدا ئه‌نجام بده‌ن.. هه‌ڵبه‌ته‌ سه‌رچاوه‌ى ئه‌و جۆره‌ تێروانینه‌ بۆ جه‌سته‌ى ژن له‌لایه‌ن به‌شێك له‌پیاوانه‌وه‌ تێروانێكى ته‌واو هه‌ڵه‌یه‌ وله‌ڕوانگه‌ى ئه‌كته‌ره‌كانى نێو فیلمه‌ پۆرنه‌كانه‌وه‌ سه‌رچاوه‌ى گرتووه‌. ئه‌وان ئاگادارنین له‌وه‌ى ئه‌و فیلمانه‌ به‌چه‌نده‌ها شێواز ئاماده‌كارى پێشوه‌ختیان بۆ ده‌كرێت بۆ ئه‌وه‌ى به‌وروژێنه‌رترین شێواز بخرێته‌ پێش چاوى بینه‌ر، ناكرێت به‌هیچ شێوه‌یه‌ك بخزێنرێنه‌ نێو ژیان و سه‌رجێگاى هاوبه‌شى ژن و مێرد له‌كۆمه‌ڵگاى كوردیدا، چونكه‌ هه‌موو ئه‌و دیمه‌نانه‌ دروستكراون، دوورن له‌ڕاستییه‌وه‌.. بێگومان هۆكارى ئه‌م بیركردنه‌وانه‌ش هه‌ر دیسان بۆئه‌وه‌ ده‌گه‌ڕێته‌وه‌ كه‌تاك له‌ته‌مه‌نى منداڵیدا پڕچه‌ك نه‌كراوه‌ به‌زانیارى پێشوه‌خت له‌باره‌ى بابه‌ته‌ سێكسى و جه‌سته‌ییه‌كانه‌وه‌ وه‌كو ئاماده‌كارییه‌ك بۆ قۆناغه‌كانى دواتر و به‌تایبه‌تیش قۆناغى چوونه‌ نێو پرۆسه‌ى هاوسه‌رگیرییه‌وه‌.. به‌راستى ته‌كنه‌لۆژیا بۆته‌ هۆكارێك بۆ بڵاوبوونه‌وه‌ى ده‌یان گرێى ده‌روونى له‌ناخى ژنان وپیاوانیش له‌كۆمه‌ڵگاى كوردیدا به‌وه‌ى كه‌هه‌ر یه‌كیان لاى خۆیه‌وه‌ هه‌ست به‌وه‌ بكات ناتوانێت حه‌زو ئاره‌زووه‌ سێكسییه‌كانى لایه‌نه‌كه‌ى تر تێربكات هاوشێوه‌ى ئه‌و ڕووداوانه‌ى له‌نێو فیلمه‌ پۆرنه‌كانه‌وه‌ بڵاوه‌یان پێده‌كرێت، كه‌جگه‌ له‌بازرگانى كردن به‌جه‌سته‌ى ژن وپیاو هیچ خوێندنه‌وه‌یه‌كى تر هه‌ڵناگرێت.

* وروژاندنى بابه‌تى رۆشنبیرى و په‌روه‌دره‌ى سێكسى لاى به‌شێك له‌كۆمه‌ڵگا به‌شێوه‌یه‌ك خوێندنه‌وه‌ى بۆ ده‌كرێت كه‌ده‌روازه‌یه‌كه‌ بۆ لێدان له‌بنه‌ما ڕه‌وشتییه‌كان وهاوكات هاندانیشه‌ بۆ بڵاوكردنه‌وه‌ى به‌دڕه‌وشتى.. به‌پێچه‌وانه‌شه‌وه‌، به‌شێكى تر واى ده‌بینن رێگاچاره‌و خۆپاراستنه‌ له‌بڵاوبوونه‌وه‌ى به‌دڕه‌وشتى..  له‌نێوان ئه‌و دوو جه‌مسه‌ردا كامیان دروسته‌ ؟

ـ نه‌خێر، لادان نییه‌ له‌بنه‌ما ڕه‌وشتییه‌كان، به‌ڵكو خۆپاراستن و رێگا چاره‌یه‌ بۆ چۆنییه‌تى مامه‌ڵه‌كردن.. ئێمه‌ تاوه‌كو زیاتر قسه‌ له‌سه‌ر ئه‌و بابه‌ته‌ بكه‌ین به‌شێوه‌یه‌كى كراوه‌ ده‌توانم بلێم زیاتر پارێزگارى له‌منداڵه‌كانمان ده‌كه‌ین.. بابه‌تى رۆشنبیرى هه‌رگیز نابێته‌ هۆى به‌دڕه‌وشتى جا له‌هه‌ر بوارێكدا بێت و به‌تایبه‌تیش بوارى سێكس وجه‌سته‌ .. به‌نده‌ له‌ته‌مه‌نى 10 ساڵییه‌وه‌ له‌خوێندنگاكانى دانیمارك فێرى چۆنییه‌تى په‌روه‌دره‌ى سێكسى كراوم، دایك و باوكیشم به‌پێ پێویست ئه‌م بابه‌ته‌یان له‌گه‌ڵدا تاوتوێ نه‌كردووم.. ئه‌وان كه‌سانێكى داخراو نه‌بوون، رێنماییان كردووم، به‌ڵام به‌شێوازێكى ورد شیكردنه‌وه‌یان بۆ نه‌ده‌كردم، بابه‌تى رۆشنبیرى سێكسیش لاى ئه‌وان به‌ماناى به‌دڕه‌وشتى نه‌بوو تاوه‌كو رێگام پێنه‌ده‌ن له‌هه‌فته‌ى شه‌شه‌مدا كه‌تایبه‌ت بوو به‌رۆشنبیرى سێكسى ڕوو له‌خوێندنگا بكه‌م.. ئێمه‌ ده‌مانزانى كه‌ كۆمه‌ڵێك لایه‌ن هه‌یه‌ ده‌بێت پارێزگارى لێبكه‌ین تاوه‌كو ئه‌و رۆژه‌ى ده‌چێنه‌ نێو ژیانى هاوسه‌رگیرییه‌وه‌، به‌ڵام ئێستا شته‌كان گۆڕاون.. به‌ به‌ڵگه‌وه‌ ئاماژه‌ به‌وه‌ده‌كه‌م كه‌سێكس كردن له‌پێش چوونه‌ نێو پرۆسه‌ى هاوسه‌رگیرییه‌وه‌ له‌كوردستان زۆره‌.. بۆیه‌ گرنگه‌ له‌بابه‌ته‌ سێكسییه‌كاندا كچان وكوڕانیش ئامۆژگارى بكرێن وهاوشێوه‌ى یه‌كتریش حه‌زو ئاره‌زووه‌كانیان له‌به‌رچاوبگیرێت.. هه‌روه‌ها مافى ژنانیشه‌ له‌وه‌ ئاگاداربن كه‌خاوه‌نى جه‌سته‌یه‌كن و مافى ئه‌وه‌یان هه‌یه‌ زانیاریان له‌سه‌ر هه‌بێت، چونكه‌ قسه‌كردن له‌سه‌ر بابه‌تى مافى ژنان ته‌نها ئه‌وه‌نییه‌ ژنێك بگه‌ێنرێته‌ پۆستێكى باڵاى سیاسى یاخود ئیدارى، به‌ڵكو به‌و مانایه‌ دێت چۆن بتوانرێت به‌بنه‌ما سه‌ره‌كییه‌كانى وجودى خۆى ئاشنا بكرێت.

* یاریكردن به‌ئه‌ندامه‌ هه‌ستیاره‌كانى جه‌سته‌ بۆ هه‌ردوو ڕه‌گه‌ز، دیارده‌یه‌كى شاراوه‌یى نێو هه‌رزه‌كارانه‌ به‌تایبه‌ت، تاڕادیه‌كى زۆریش بوونى هه‌یه‌... زانستى پزیشكى چى له‌و باره‌یه‌وه‌ ده‌لێت؟

ـ دیارده‌یه‌كى ته‌واو سروشتییه‌.. منداڵ چ كوڕ بێت یاخوود كچ له‌ته‌مه‌نى 12 ساڵییه‌وه‌ ڕوبه‌ڕووى كۆمه‌لێك گۆرانكارى هۆرمۆنى ده‌بێته‌وه‌، ئه‌وه‌ش واده‌كات حه‌زیان بۆگه‌شتن به‌حاڵه‌تى ئۆرگازم زیاتر ببێت.. له‌ڕووى زانستى پزیشكییه‌وه‌ ئه‌وه‌ هاوشێوه‌ى حاڵه‌تێكى ئاسایى جه‌سته‌ خوێندنه‌وه‌ى بۆ ده‌كرێت، هه‌روه‌كو چۆن جه‌سته‌ پێویستى به‌خۆراك، ئاو هه‌یه‌ به‌هه‌مان شیوه‌ش پێویستى به‌و حاڵه‌تانه‌ ده‌بێت، ناكرێت وه‌كو مه‌ترسییه‌ك سه‌یر بكرێت.. لێره‌دا رۆڵى دایكان و باوكان ده‌بێت رۆلێكى هێوركه‌ره‌وه‌و ئاسایى بێت، چونكه‌ ئه‌م حاڵه‌ته‌ له‌بنه‌ڕه‌تدا ماوه‌یه‌ك ده‌خایەنێت و نابێته‌ عاده‌ت یاخوود خویه‌ك له‌جه‌سته‌و ده‌روونى منداڵه‌كه‌، به‌ڵكو ئه‌وه‌ى زۆر گرنگه‌ لێره‌دا كارى له‌سه‌ر بكرێت ئه‌وه‌یه‌ چۆن بتوانیت كچه‌كه‌ت ڕابهێنیت كه‌دووگیان نه‌بێت.. یاخوود كوڕه‌كه‌ت ڕوبه‌ڕووى پرۆسه‌ى جوتبوون نه‌بێته‌وه‌ له‌ده‌ره‌وه‌ى ماڵه‌كه‌تدا، له‌گه‌ڵ كه‌سێكى تر.. هه‌موو مرۆڤێك حه‌زى سێكسى هه‌یه‌ ئه‌وه‌ بابه‌تێكى ته‌واو زانستییه‌، به‌ڵام تیشك نه‌خستنه‌سه‌ر ئه‌و بابه‌تانه‌ به‌شێوازه‌ دروسته‌كه‌ى ئه‌م كۆمه‌ڵگایه‌ى به‌رهه‌م هێناوه‌ كه‌ئێستا ده‌یبینین.


پرۆفایل:

د.نگین جه‌عفه‌ر

ـ ده‌رچووى كۆلێژى پزیشكى/ Aarhus University ـ 2005

ـ پسپۆرى بوارى ژنان ومنداڵبوون له‌نه‌خۆشخانه‌ى Aarhus University hospital ـ دانیمارك

ـ چالاكوان له‌بوارى هۆشیارى و ته‌ندروستى سێكسى


چاوى خه‌ڵك: ئه‌ڤین 


 


 


 

 


PM:06:07:28/07/2019




ئه‌م بابه‌ته 1233 جار خوێنراوه‌ته‌وه‌‌