مارینا جابر: هەر پرۆژەیەک خزمەت بەژن وکۆمەڵگا بکات دەیکەین

ماوەیەک لەمەوبەر لەشارى بەغدا کچە هونەرمەندێکى ئێراقى بیرۆکەى لێخورینى پاسکیلى بەکۆمەڵ لەلایەن کچانەوە لەنێو شەقام وشوێنەگشتییەکان دا کرد بەواقیع، مارینا جابر کچە هونەرمەندى شێوەکارى ئێراقى، لەدیدارێکى کورتى ماڵپەرى "چاوى خەڵک" دا، وتى" ئێمە بەردەوامین، هەر پرۆژەیەکیش خزمەت بەژن وکۆمەڵگا بکات بێگومان کارى لەسەر دەکەین"، وبەمشێوەیەش وەلامى پرسیارەکانى داینەوە:

چاوى خەڵک: ماوەیەک لەمەوبەر لەشارى بەغداى پایتەخت کەمپینى لێخورینى پاسکیلتان بۆ کچان وکوران رێکخست.. بیرۆکەى ئەو کارە چۆن بوو وچۆن توانیتان بەشێوەیەکى کردارى جێبەجێى بکەن ؟
مارینا: سەرەتادا ئەمەوێت روونکردنەوەیەک بدەم.. زۆرێک لەماڵپەرە ئەلیکترۆنیێەکان ئاماژەیان بەوەداوە کەمن وەکو چالاکوانێکى بووارى مەدەنى ئەو کەمپینەم راگەیاندووە ،لەراستییدا وانییە..  من چالاکوانى بووارى مەدەنى  نیم بەڵکو، هونەرمەندێکى شێوەکارم.. ئەو بابەتەش کە بەکەمپین ناوبراوە لەبنەرەتدا کەمپین نییەو سەرچاوەگرتووى کارێکى هونەرى خۆمە بەوەى کەویستم بیرۆکەى لێخورینى پاسکیل بەتایبەت بۆخانمان  لەناو شەقام وشوێنەگشتیێەکانى شارى بەغدا بکەم بەواقیعێکى بینراو، ئیدى دواى بەشدارى کردنیشم لەپێشانگایەکى هونەرى بەهاوکارى ژمارەیەک لەهاورێیانم توانیم بیرۆکەکە لەئەرزى واقیعدا جێبەجیێ بکەم.

چاوى خەڵک: کاردانەوەى کۆمەڵگا چۆن بوو .. ئایا توانیتان ئامانجى خۆتان بپێکن؟
مارینا: بەراستى زۆر هاوکارمان بوون لەوەى بیرۆکەکە بەئەنجام بگات، ئەگەرچى خەڵکانێکیش هەبوون بەتوندى روبەرووم بوونەوە بەتایبەت دواى بڵاوکردنەوەى بابەتەکە لەتۆرى کۆمەڵایەتى ئینیسگرام، بەڵام  لەگەڵ ئەوەشدا بریارى بەردەوام بوون راگەیاند ودواتریش ئەوەى ئێمە هەستمان پێکرد لەنێوشەقامەکاندا تارادەیەک جیاوازتر بوو لەوەى لەتۆرە کۆمەڵایەتییەکاندا روویاندا تەنانەت خەڵک هەبوو پێیان دەوتین " بەم کارەتان بەغداى سەردەمانى ئاوەدانیتان بیرهێناینەوە ".. بۆیە شێوازى کاردانەوەى خەڵک لەرێگاى سۆشیاڵ میدیا وتۆرە کۆمەلایەتییەکانەوە جیاوازتر بوو، بەڵام کاردانەوەى شەقام تارادەیەکى زیاتر هیوابەخش بوو ، هەر ئەوەش  وایلێکردین زیاتر سووربین لەسەر بەئەنجام گەیاندنى کارەکە.

چاوى خەڵک: باشە، وەکو ئەوەى دەیبینن دۆخى ئەمنى وسیاسى بەغدا لەئێستادا جێگیر نییەو رۆژانە هەواڵى کردەوەى تیرۆرستى لێرەو لەوێ دەبیسترێت.. ئێوە هیچ ترسێکتان نەبوو لەوەى کەرەنگە بەهۆى ئەو کارەوە رووبەرووى کردەوەیەکى تیرۆرستى ببنەوە ؟
مارینا: ئێمە وەکو خەڵکى ئێراق رۆژانە روبەرووى کردەوەى تیرۆرستى دەبینەوە، ئەمە ئەو واقیعە تاڵەیە کەراهاتووین لەگەلێدا وبریارمانداوە رووبەرووى ببینەوە، چونکە ژیان بەردەوامەو ناوەستێت ئێمەش ویستمان ئەو پەیامە بەکۆمەڵگا بگەێینن بەوەى کەکچان وکورانى ئەم وڵاتە بونیاتنەرى راستەقینەى جومگەکانى ژیانن وئەوان دینامۆى بەردەوامى جوانیێەکانى ژیانن ئیدى زۆریش بیرمان لەو لایەنە نەکردەوە. 
 
چاوى خەڵک: هیچ لایەنێک هەبوو سپۆنسەرى ئەو هەنگاوەتان بکات ؟
مارینا: نەخێر.. هێچ لایەنێک سپۆنسەرى نەکردێن وتەنها خۆم سەرپەرشتى کارەکەم کرد،بەڵام دواتر  بیرۆکەکە بۆ بەبابەتى خەڵک وهەر ئەوانیش رۆڵى گەورەیان هەبوو لەسەرخستنى.

چاوى خەڵک: بەشداربووان کێ بوون.. ئایا ئەوانیش خەڵکى ئاسایى بوون یاخوود سەر بەشوێنێک ولایەنێکى دیاریکراو ؟
مارینا: بەشداربووان کەسانى ئاسایى بوون وسەر بەهیچ لایەنێک نەبوون.. ئەوان لەرێگاى ئینیستیگرامەوە وێنەکانى منیان بینیبوو ودواتریش هەر لەو رێگایەوە پەیوەندییان پێوەکردم وداوایان کرد بەشدارى چالاکیێەکە بکەن.

چاوى خەڵک: دەکرێت لەداهاتوودا پیرۆکەى پرۆژەیەکى هاوشێوە یاخوود پرۆژەیەکى جیاوازتر دووبارە ببێتەوە ؟
مارینا: بێگومان پرۆژەى زیاترمان دەبێت.. لەئێستاشدا سەرقاڵى پرۆژەیەکى ترین تایبەت بەوەى کەیاریگا وەرزشیێەکان دەبێت مافى هەموو ئەندامانى کۆمەڵگا بێت بەبێ جیاوازى  بەتایبەتیش بۆ کچان کەئەوانیش مافى ئەوەیان هەیە هاوشێوەى کوران لەیارێگاکانى تۆپێ پێ وەکو نموونە خواستە وەرزشیێەکانى خۆیان مومارەسە بکەن.. ئێمە لەئێستادا ئەو پرۆژەیەمان لەبەرنامەدایەو کارى بۆ دەکەین .. هەروەها هەموو پرۆژەیەکیش کەخزمەت بە ژن وکۆمەڵگا بکات بێگومان ئێمە کارى لەسەر دەکەین لەداهاتوودا.

چاوى خەڵک/ ئەڤین



PM:01:07:28/02/2017




ئه‌م بابه‌ته 198 جار خوێنراوه‌ته‌وه‌‌