دولۆریس هوێرتا.. دینامۆى شۆرشێکى نوێى ژنان بەرامبەر بەترامپ

دوابەدواى گەشتنى دۆناڵد ترامپى سەرۆکى تازە هەڵبژێردراوى ئەمریکا بۆ ناوەندەکانى دەسەڵات تادێت ژمارەى نەیارانى روو لەزیادبوون دەکات ئەوەش وەکو کاردانەوەیەک بەرامبەر بەسیاسەتەکانى سەرۆکى ناوبراو لەکایە جیاوازەکاندا بەگشتى ولەگرنگترینیشیان دۆسییەکانى ژنان وکۆچبەران و...هتد، لەئێستاشدا دولۆریس هوێرتا ( 86 ساڵ) یەکێک لەناودارترین ژنە فیمینیزمەکانى رەوتى کرێکارانى ئەمریکا، وەکو خۆى ئاماژەى پێ دەکات" نەیاریە تازەکەى ترامپەو لەخۆئامادەکردندایە بۆ روبەرووبوونەوەى سیاسەتەکانى" ئەوەش پاش ئەوەى خانمى ناوبراو چەند رۆژێک لەمەوبەر ولەچوارچێوەى فیستیڤالی سینەمایى "ساندانس"ى جیهانى  بە بەرهەمێکى دۆکۆمینتکارى تایبەت بە ژیانى سیاسی وەکو هێمایەک بۆ ئازادى ودیموکراسى لەئەمریکا بەئامادەبووانى فیستیڤاڵەکە ناسێنرا.

هوێرتا.. هێمایەک بۆ پێشخستنى دیموکراسیەت
پیتەر براتى دەرهێنەرى بەرهەمەکە، دەربارەى هوێرتا دەدوێت وبەخانمێکى خاوەن بیرو هزرێکى پێشکەوتووخوازانەى وەسفدەکات ودەلێت "  دولۆریس هوێرتا لەبنەماڵەیەکى کۆچبەرى مەکسیکی چاوى بەژیان هەڵهێنا، ئەو لەسەردەمی قەیرانى ئابوورى جیهانى ژیابوو ساڵى 1929 کە لەو سەردەمەشدا زۆرینەى وڵاتانى جیهان بەدەستى ئاسەوارەکانى هەژارى ونەبوونییەوە دەیانناڵاند، بەڵام لەگەڵ ئەوەشدا ناکرێت نکۆڵى لەو راستییە بکەین کەئەو خانمە چالاکوانە بەدرێژایى 50 ساڵى بەردەوام زۆر بوێرانە توانى جێدەستى خۆى لەپرۆسەى گەشەپێدان وپێشخستنى چەمکى دیموکراسییەت لەئەمریکادا بنەخشێنێت"، ئەو دەرهێنەرە جەخت لەوەش دەکات" بەرهەمەکە گوزەرێکى راستەقینەیە بەنێو ژیانى پیشەیى هوێرتا وتیشک خستنەسەر خەبات وماندووبونیێەتى لەپێناوى چینى کرێکاران وجووتیاراندا بەئاراستەى بەدیهێنانى تەواوى مافەکانیان لەدیاریکردنى کرێى کارو پاراستنیان لەمەترسیێەکانى کارى رۆژانەو هەروەها دابینکردنى ماف وداواکاریێەکانیانیشیان لەژیانێکى شایستەدا.. بۆیە ئەو بەرهەمە دۆکومینتکارییە چ لەناوەرۆک وچ لە بنەرەتیشدا زۆر لەوە گەورەترە کەتەنها بەرهەمێکى دۆکۆمینتکراوى چەند خولەکى بێت، بەڵکو ئەوە ئاوێنەیەکى راستەقێنەیە بۆ خستنەرووى خەباتى ژنێکى ماندوو لەقۆناغە جیاوازەکانى ژیانى کۆمەڵایەتى کۆمەڵگاى ئەمریکادا".

تەمەنێک لەخەبات وماندووبوون
دولۆریس هوێرتا بەدرێژایى ژیانى 3 جار هاوسەرگیرى ئەنجامداوەو 11 کوریشى هەبووە، بەڵام وەکو سەرچاوەکان ئاماژەى پێ دەکەن  یەکێک بووە لەدیاریترین ئەو ژنە چالاکوانانەى ئەمریکا کەمافى لەباربردنى منداڵی وەکو مافێکى سروشتى ویاسایى بۆ ژن هەژمارکردووەو هەمیشە دەنگێکى بوێرى نارازى بووە بەرووى دەسەڵات و ئەو بریارانەى کەژنیان لەقاڵبێکى دیاریکراودا هێشتۆتەوە .. هەر ئەوەش بووە کەبۆتە هۆکارى ئەوەى زیاتر لە20 جار بەدرێژایى ژیانى لەلایەن هێزە ئەمنییەکانى ئەمریکاوە دەستگیربکرێت رووبەرووى ئازارو ئەشکەنجەدانى زۆر ببێتەوە بەتایبەتیش لەرێپێوانەکانى ساڵى 1988 ویلایەتى سان فرانسیسکۆدا کەلەلایەن هێزەکانى پۆلیسەوە دواى دەستگیرکردنى بۆ چەند رۆژێک بێ سەروشوێنکرا.. دەربارەى ئەو بەرهەمەش کەباس لەژیان وخەباتى دەکات،خاتوو هوێرتا دەلێت" بەراستى فیلمەکە کارێگەرى زۆرى هەبوو، لەئەمریکا تاوەکو ئێستاش زۆرێک لەرووداوەکان وەکو خۆیان ماون ونەگۆراون لەوانە توندوتیژى دژ بەژنان وستەمکارى هێزەکانى پۆلیس .. ئەمەش ئەو راستییەمان دەخاتە پێش چاو کەکاروانى خەباتمان دەبێت زیاتر درێژەى پێ بدرێت ،چونکە هێشتا رێگایەکى دوورو درێژمان لەپێشدایە بەرەو بەدیهینانى تەواوى ماف وئازادییەکانى تاک لەنێو کۆمەڵگەى ئەمریکی دا ".

ژن وسیاسەت وهەڵبژاردنەکانى ئەمریکا
هەڵبژاردنەکانى ساڵى  2016 ى ئەمریکا بەپێ بۆچوونى هوێرتا پرۆسەیەکى لەباربوو بۆ دابرینى ژن لەمومارەسەکردنى کارى سیاسى، وەکو خۆشى ئاماژەى پێ دەکات  " هەڵبژاردنەکان پرۆسەیەکى بەسیستەمکراو بوو کەتوانى ژن لەمومارەسەکردنى مافە سیاسییەکانى داببرێت، هەروەها هەموو ئەو جیاکارییانەشى دەرخست کە بەرامبەر بەتواناکانى ژنان دەکرێن وخودى ژن دەکەنە پلەدوو لەناوەندەکانى بریاردا.. بەڵى، گەلى ئەمریکا خاوەن ژنێکى لێهاتوو وبەتوانا بوو بۆ ئەوەى لەقۆناغەکانى داهاتوودا رابەرایەتى وڵاتەکەمان بکات.. لەبەرامبەریشدا پیاوێکى بێ ئەزموون هەبوو کەهیچ شارەزایێەکى نەبوو لەبووارى کارى حکومییدا،بەڵام وەکو بینیتان دۆناڵد ترامپ سەرکەوت و هێلارى کلینتونیش خرایە دەرەوەى کێبرکێیەکەوە.. ئەمەش نموونەیەکى ترە لە نەگبەتییەکانى دونیاى سیاسەت ودەسەڵات ".  

خۆئامادەکردن بۆ روبەرووبوونەوەکانى داهاتوو
لەئێستادا دۆلوریس هوێرتا دەنگێکى ژنانەى بوێرانەیە لەنێو کۆمەڵگاى ئەمریکییداو هاوکات رابەرایەتى بزووتنەوەیەکى پێشکەوتووخوازى کۆمەڵایەتیش دەکات لەو وڵاتەدا.. وەکو خۆشى دەلێت " هەست بەئاسوودەیێەکى زۆر دەکەم کەتوانیمان بزووتنەوەیەکى کۆمەڵایەتى توکمە و بەهێز بهێنینە ئاراوە".. لەگەڵ هاتنە دەسەڵاتى دۆناڵد ترامپى سەرۆکى ئێستاى ئەمریکاش هوێرتا چەقى خەبات وچالاکییەکانى چرترکردۆتەوە ئەوەش وەکو" خۆئامادەکردنێک بۆ رووبەرووبوونەوەکانى داهاتوو" ، چونکە پێى وایە هەموو ئەو دەستکەوتانەى لەبووارەکانى ژێنگەو مافەکانى کرێکاران وژنان دا هاتوونەتە کایەوە دەشێت جارێکى تر بکەونەوە ژێر مەترسى راستەقێنەوە لەسەردەمى دۆناڵد ترامپ و روونیدەکاتەوە" سروشتى رێگاى خەبات وایە: دوو هەنگاو بۆ پێشەو وهەنگاوێکیش بۆ دوواوە، بەڵام ئەوەى گرنگە نەوەستین و بەردەوام بین.. ئیدى ئێوەش ئەى گەلى ئەمریکا سندوقەکانى دەنگدان بکەنە بریاردەرى داهاتووى وڵاتەکەتان.. خۆپیشاندانەکان چیتر سوودیان نابێـت ئەگەر رەنگدانەوەى راستەقینەى نەبێت لەسەر پرۆسەکانى دەنگدان  لەداهاتوودا ".

چاوى خه‌ڵك/ ئاژانسه‌كان


PM:06:32:19/02/2017




ئه‌م بابه‌ته 359 جار خوێنراوه‌ته‌وه‌‌