هەنگاوێکى تر بەرەو نەهێشتنى هاوسەرگیرى پێشوەخت

بەمەبەستى تیشک خستنەسەر ئاسەوارە نەرینییەکانى هاوسەرگیرى پێشوەخت وهەروەها بڵاوکردنەوەى هۆشیارى پێویست لەوبارەیەوە ، سەنتەرى ئاشتى رێکخراوىPDO سیمینارێکى تایبەتى بۆ ژنانى ئاوارەى ناحییەى شۆرشى سەربەقەزاى چەمچەماڵ رێکخست.
کاتژمێر 10ى سەرلەبەیانى ئەمرۆ 2017/1/9 وبەئامادەبوونى ژمارەیەکى بەرچاو لەژنانى ئاوارەى دانیشتووى ناحییەى شۆرش سەنتەرى ئاشتى رێکخراوى PDO سیمینارێکى تایبەتى بەچۆنیێەتى کەمکردنەوەى ئاسەوارە نەرینیێەکانى هاوسەرگیرى پێشوەخت لەنێو خێزانە ئاوارەکاندا رێکخست، لەوبارەیەشەوە ئەڤین ئەحمەد بەرپرسى سەنتەرى ئاشتى رێکخراوى تایبەت بەماڵپەرى چاوى خەڵک، وتى" یەکێک لەوکێشانەى زۆرینەى خێزانە ئاوارەکان بەدەستیەوە دەنالێنن کێشەى هاوسەرگیرى پێشوەختە کەزۆرێک لەو خێزانانە بەهۆى بارى قورسى ژیان وهەروەها دۆخى ئاوارەبوونەوە کچان وەکو دەروازەیەک بۆ بەدەستهێنانى برێک پارە بەکاردەهێنن ئەوەش لەرێگاى هاوسەرگیرى پێشوەختەوە ئیدى چ بەرەزامەندى ئەو کچانە بێت یاخوود دوور لەرەزامەندییان"، وتیشى" بڵاوکردنەوەى هۆشیارى پێویست لەئێستادا لەنێو ئەو خێزانانە کارێکى تائەوپەرى پێویستەو هاوکات ئەرکێکى هاوبەشى هەموو رێکخراوەکانى ژنان ورێکخراوەکانى مافى مرۆڤیشە بۆئەوەى چیتر کچان نەبنە قوربانى پرۆسەیەکى هاوسەرگیرى شکستخواردوو لەبنەرەتدا ".
لاى خۆشیەوە ش.ع ( 37 ساڵ)، یەکێک لەژنە ئاوارەکانى ئامادەبووى سیمینارەکە وتى" بەداخەوە تاوەکو ئێستاش هاوسەرگیرى پێشوەخت لەناو خێزانە ئاوارەکاندا بوونى هەیە هەرچەندە زۆرێک لەو خێزانانەش درک بەوەدەکەن کەئەو جۆرە هاوسەرگیرییە رەنگە لەدەرەنجامى بریارێکى خێرا وناچارى بێت، بەڵام سەرەراى ئەوەش هێشتا هۆشیارى پێویستیان لەبەردەستدا نییە تایبەت بەدەرەنجامەکانى ئەو جۆرە هاوسەرگیرییە.. بۆیە هەنگاوێکى باش دەبێت ئەگەر رێکخراوەکان هۆشیارى پێویست لەوبارەیەوە بڵاوبکەنەوە ".

چاوى خەڵک/ تایبەت


PM:08:03:09/01/2017




ئه‌م بابه‌ته 394 جار خوێنراوه‌ته‌وه‌‌