هیومن رایتس ووتش: دەسەڵاتى پیاوساڵارى تواناکانى ژنانى لەباربردووە

لەدوواین راپۆرتى ساڵانەى خۆیدا کەچەند رۆژێک لەمەوبەر  بڵاوکراوەتەوە رێکخراوى هیومن رایتس ووتش بۆمافەکانى مرۆڤ،جەختى لەوەکردەوە " لەنێو کۆمەڵگاى سعوودی دا ژنان بۆنەتە قوربانى یەکەم وهەمیشەیى دەسەڵاتى پیاوسالارى وتەواوى تواناكانيشيان لەباربراون بۆگەشتن بەمافەکانیان ".
لەوبارەیەشەوە سارە لیتسن بەرێوەبەرى لقى رۆژهەڵاتى ناوەراست لەرێکخراوى ناوبراودا، وتى" تاوەکو ئێستاش ژنان لەکۆمەڵگاى سعوودیدا پێویستییان بەوە هەیە بۆهەر گەشت وکارو پرۆژەیەک رەزامەندى هاوسەرەکانیان یاخوود باوک وبراکانیان وەربگرن..ئەمەش بەومانایە دێت کەژنان بۆهەمیشە دەبێت بەمافخوراوى بمێننەوە"، هەروەها وتیشى" پیاوان بریاردەرى سەرەکین لەهەموو ئەو بابەتانەى کەپەیوەندییان بەژیانى کەسییەتى ژنانەوە هەیە لەوانە بریاردان لەسەر پرۆسەى هاوسەرگیرى، گەشتکردن،بەگرخستنى تواناکانى ژنان لەکارو پرۆژەکاندا و رەنگە لەداهاتووشدا هەرپیاوان خۆیان بن بریار لەسەر خزمەتگوزارییە تەندروستییەکانى ژنانیش بدەن".
راپۆرتەکەى هیۆمەن رایتس ووتش دوابەدواى زنجیرەیەک چاوپێکەوتن دێت کە لەگەڵ 61 ژن وپیاوى سعودییدا ئەنجام دراون، یەکێک لەو ژنانەش کەبەشداربوو لەچاوپێکەوتنەکەدا دەلێت" تەمەنم 62 ساڵەو کورەکەم بووە بەسەرپەرشتیکارم.. ئیدى بروادەکەن یاخوود نە ئەوە راستییەکەیە ئەو لەهەموو شتێک کەپەیوەندى بەژیانى منەوە هەیە بەرپرسمە وئەوەش بەلاى منەوە ئەوپەرى سووکایەتی پێکردنە".
ئەگەرچى لەساڵانى 2013 ـ2015 حکومەتى ئەو وڵاتە کۆمەلێک بریارى تایبەتى لەبارەى بەشدارپێکردنى ژنان لەکایەى سیاسى وڵاتدا راگەیاند وەکو دەستیشانکردنى 30 ژن بۆئەنجوومەنى شوراو هەورەها دەستەبەرکردنى مافى ژنان لەپرۆسەکانى دەنگدان وخۆکاندید کردندا،بەڵام بەپێ راپۆرتەکەى هیومن رایتس ووتش ئەو بریارانە نەیانتوانێوە سنوورێک بۆباڵادەستى پیاوان دیارى بکەن وهێشتا ژنانیش نەیانتوانێوە لەسایەى ئەو بریارانەدا بەمافەکانى خۆیان شادببنەوە .
ماوەتەوە بووترێت شانیشینى سعودیە یەکێکە لەو وڵاتانەى کەئێمزایان لەسەر رێککەوتنامەى (سیداو) بۆنەهێشتنى جیاکارى رەگەزى دژ بەژنان کردووەو لەساڵى 2000 دا.

چاوى خەڵک/ ئاژانسەکان


AM:11:10:19/07/2016




ئه‌م بابه‌ته 365 جار خوێنراوه‌ته‌وه‌‌